Azərbaycana Monqolustandan gətirilən quzu əti niyə 15 AZN-ə satılır? – RƏSMİ AÇIQLAMA

Biznes TV BAKU.WS-ə istinadən xəbər verir ki, Azərbaycanda quzu əti bazarında maraqlı bir yenilik yaşanır. Monqolustandan gətirilən hazır quzu ətləri ölkə bazarına daxil olub və 1 kiloqramı 15 manatdan satışa çıxarılıb.

Bu vəziyyət həm istehlakçıların, həm də yerli fermerlərin diqqətini cəlb edib.

Monqolustan quzu əti dünyada keyfiyyətli və təbii məhsul kimi tanınır. Ölkənin heyvandarlıq sahəsində zəngin təcrübəsi və təbii şəraitdə yetişdirilən qoyunlar bu ətləri qida sənayesi üçün yüksək dəyərli məhsula çevirir. Monqolustandakı ət qiymətləri isə Azərbaycanla müqayisədə xeyli aşağıdır.

Monqolustanın Statitika İdarəsinin ötənilki rəqəmlərinə əsasən qiymətlər belədir:

Mal əti – kiloqramı 17 min tuqrik (8.38 AZN)

Quzu əti – kiloqramı 18 min tuqrik (8.87 AZN)

Keçi əti – kiloqramı 9 min tuqrik (4.43 AZN)

Dəvə əti – kiloqramı 8 min tuqrik (3.94 AZN).

Kəsim üçün satılan heyvanların qiyməti isə belə deyişir:

Qoyun və ya keçi – 120-180 min tuqrik (57.8-88.4 AZN).

İri buynuzlu mal-qara – 1,2 milyon – 2,3 milyon tuqrik (590-1132 AZN).

Dəvə – 1-1,5 milyon tuqrik (491.3-737.8 AZN).

Azərbaycana gətirilən Monqolustan quzu ətinin keyfiyyəti ilə bağlı suallar yaranır. Bununla bağlı Azərbaycan Respublikasının Qida Təhlükəsizliyi Agentliyindən (AQTA) BAKU.WS-in sorğusuna verilən cavabda bildirilib ki, ölkəyə idxal olunan bütün ət və ət məhsulları ciddi nəzarətdən keçirilir.

AQTA açıqlamasında qeyd edib:

• Xarici ölkələrdən, o cümlədən Monqolustandan gətirilən ət məhsulları öncə epizootik vəziyyətin təhlilindən sonra icazə alır.
• Yük partiyaları ölkəyə daxil olduqdan sonra Agentliyin əməkdaşları tərəfindən məhsullardan nümunələr götürülərək laborator analizlərə göndərilir.
• Yalnız qida təhlükəsizliyi tələblərinə cavab verən məhsullara sertifikat verilərək dövriyyəyə buraxılır.

AQTA həmçinin vurğulayıb ki, ət məhsullarının qiymətinin müəyyən edilməsi onların səlahiyyətinə daxil deyil. Lakin qiymətindən asılı olmayaraq bütün məhsulların təhlükəsizlik və keyfiyyət göstəriciləri norma çərçivəsində təmin olunur.

Sonda qeyd edirik ki, istehlakçılar qida təhlükəsizliyi tələblərinin pozulması halları ilə rastlaşdıqda, Agentliyin “1003 – Çağrı Mərkəzi”nə zəng vuraraq məlumat verə bilərlər”.

Mənbə: BAKU.WS