“AzInTelecom” MMC “Africa Tech Festival 2024”də iştirak edib

“AzInTelecom” CAR-da keçirilən “Africa Tech Festival 2024” sərgisində iştirak edib

Rəqəmsal İnkişaf və Nəqliyyat Nazirliyinin tabeliyində fəaliyyət göstərən “AzInTelecom” MMC Cənubi Afrika Respublikasının (CAR) paytaxtı Keyptaunda təşkil olunan beynəlxalq “Africa Tech Festival 2024” tədbirində təmsil olunub.

Tədbirdə “AzInTelecom” MMC öz məhsul və xidmətlərini nümayiş etdirmək üçün xüsusi stendlə çıxış edib. Şirkətin əməkdaşları stendə yaxınlaşan iştirakçılara təqdim olunan SİMA rəqəmsal həllər platforması və “bulud” xidmətləri haqqında ətraflı məlumat veriblər. Bu xidmətlər xüsusilə ziyarətçilər tərəfindən maraqla qarşılanıb və yüksək qiymətləndirilib.

Tədbir çərçivəsində “AzInTelecom” əməkdaşları Afrika qitəsinin müxtəlif ölkələrində fəaliyyət göstərən, əsasən bank və maliyyə texnologiyaları sahəsində ixtisaslaşmış şirkətlərin nümayəndələri ilə görüşlər keçirib. Görüşlərdə qarşılıqlı əməkdaşlıq perspektivləri və yeni layihələr üzrə müzakirələr aparılıb.

“Africa Tech Festival 2024” haqqında

“Africa Tech Festival” hər il təşkil olunan beynəlxalq miqyaslı tədbirdir və əsasən Afrika qitəsi olmaqla, dünyanın müxtəlif ölkələrindən informasiya və kommunikasiya texnologiyaları sahəsində fəaliyyət göstərən şirkətləri bir araya gətirir. Builki tədbir sərgi, seminar və ekspert çıxışları ilə yadda qalıb. Şirkətlər innovativ texnoloji həllərini təqdim edərək yeni ticarət əlaqələri qurmaq və beynəlxalq əməkdaşlıq çərçivəsini genişləndirmək üçün mühüm imkanlar əldə ediblər.

Mənbə: APA-Economics