“AzInTelecom” yeni “AzInCloud” platformasını təqdim edib

Rəqəmsal İnkişaf və Nəqliyyat Nazirliyinin tabeliyində fəaliyyət göstərən “AzInTelecom” MMC hər kəsin “bulud” xidmətlərindən yararlana biləcəyi yeni “AzInCloud” platformasını istifadəyə verib.

Ölkənin ən böyük “bulud” provayderi olan “AzInTelecom” platforma vasitəsilə tam idarəolunan infrastruktur, təhlükəsiz məlumat saxlama, inkişaf etmiş kibertəhlükəsizlik və 24/7 dəstək xidmətləri təqdim edir. “İstifadə etdiyin qədər ödə” modeli ilə fəaliyyət göstərən platforma istifadəçilərə rahat idarəetmə, hazır əməliyyat sistemləri, “bulud” market, monitorinq xidməti və resurs tələblərinə uyğun xüsusi paketlər təklif edir.

“AzInCloud” ictimai “bulud” xidməti olaraq bütün qurumlar, o cümlədən kiçik və orta bizneslər, fərdi sahibkarlar və fiziki şəxslər üçün əlçatandır. İstifadəçilər xidmət ofisinə müraciət etmədən, sadəcə www.azincloud.az saytında onlayn qeydiyyatdan keçməklə bir neçə dəqiqə ərzində öz “bulud” infrastrukturunu yarada bilərlər.

Platformanın əsas məqsədi Azərbaycanda biznes mühitində rəqəmsal transformasiyanı təşviq etmək və fərdlərin rəqəmsallaşmada iştirakını artırmaqdır. Hazırda “AzInTelecom” iki müasir TIER 3 standartlı Data Mərkəz vasitəsilə təhlükəsizlik baxımından ən yüksək səviyyədə xidmətlər göstərir.

Daha ətraflı məlumat üçün “AzInCloud” platformasının veb-səhifəsinə müraciət edə bilərsiniz.