Bakıda VIII Beynəlxalq Bankçılıq Forumu keçirilir

BiznesTV Trend-ə istinadən xəbər verir ki, forumun əsas mövzuları arasında rəqəmsal transformasiya (rəqəmsal və neobanklar), məlumat və analitika ilə iş strategiyası, ödəniş mənzərəsinin təkamülü (təmassız texnologiyalara keçid), ani, fasiləsiz və uyğun beynəlxalq ödənişlər, mərkəzləşdirilməmiş maliyyə (DeFi) inqilabı, bulud sistemləri və köhnəlmiş texnologiyalar üçün alternativlər, kibertəhlükəsizlik, sabitlik və dayanıqlılıq prizmasından rəqəmsallaşma, ekoloji və dayanıqlı bankçılıq xidməti (ESG) məsələləri var.

Azərbaycan Mərkəzi Bankının baş direktoru Vüsal Xəlilov bildirib ki, ölkədə qəbul edilən “Yaşıl taksonomiya” dayanıqlı inkişaf məqsədlərinə çatmaq üçün güclü baza yaradacaq. O qeyd edib ki, Azərbaycan bank sektoru iqlim dəyişikliyinə qarşı mübarizə və dayanıqlı inkişafı dəstəkləmək üçün 2 milyard manat vəsait ayırıb.

Türkiyənin Bank Nəzarəti və Tənzimlənməsi İdarəsinin sədr müavini Mustafa Aydın Azərbaycanın rəqəmsallaşma və fintex sahəsində böyük potensiala malik olduğunu vurğulayıb. O, iki ölkə arasında əməkdaşlığın bu sahədə mövqeləri gücləndirə biləcəyini qeyd edib.

Azərbaycan Banklar Assosiasiyasının prezidenti Zakir Nuriyev milli ödəniş sistemləri vasitəsilə əməliyyatların həcminin 3,6 dəfə artaraq 606 milyard manata çatdığını və nağdsız ödənişlərin 63,8 faiz təşkil etdiyini bildirib.

İqtisadi İslahatların Təhlili və Kommunikasiya Mərkəzinin icraçı direktoru Vüsal Qasımlı isə bankların ESG standartlarına uyğun strategiyalar hazırlayaraq yaşıl maliyyələşməni və dayanıqlı layihələri dəstəkləmələrinin vacibliyini vurğulayıb. O qeyd edib ki, “Yaşıl taksonomiya” iqtisadiyyatın müxtəlif sahələrində yaşıl fəaliyyət növlərini müəyyənləşdirən mühüm sənəddir.