“BİRLİK VƏ QARDAŞLIQ” ADLI ƏNƏNƏVİ İFTAR

“BİRLİK VƏ QARDAŞLIQ” ADLI ƏNƏNƏVİ İFTAR
“UID AZƏRBAYCAN” TƏŞKİLATI 4-CÜ DƏFƏ HAMINI SÜFRƏ ƏTRAFINA TOPLAYIB

UID Azərbaycan təşkilatı tərəfindən “Birlik və Qardaşlıq” adlı ənənəvi iftar təşkil olunub. Artıq ənənə halını alan və sayca 4-cü dəfə keçirilən mərasimdə müxtəlif sahələri təmsil edən minə yaxın qonaq iştirak edib. Tədbirin rəsmi açılış mərasimində çıxış edən UID Azərbaycan təşkilatının rəhbəri Cengiz Aygör qonaqları salamlayaraq tədbirin məqsəd və əhəmiyyətindən danışıb. Qeyd edib ki, “Birlik və Qardaşlıq” adlı iftar tədbiri yalnız Ramazan ayının mənəvi dəyərlərini bölüşmək deyil, eyni zamanda Azərbaycan və Türkiyə arasında dostluq, qardaşlıq və əməkdaşlıq münasibətlərinin daha da möhkəmlənməsinə töhfə verən mühüm platformadır.
Tədbirdə iştirak edən UID təşkilatının sədr müavini Mehmet Akkoç çıxışında Uluslararası Demokratlar Birliyinin fəaliyyət istiqamətləri və beynəlxalq səviyyədə həyata keçirdiyi layihələr haqqında məlumat verib. Belə görüşlərin ölkələr arasında sosial və mədəni əlaqələrin gücləndirilməsində mühüm rol oynadığını vurğulayıb.
Tədbirdə çıxış edən Türkiyə–Azərbaycan Dostluq Qrupunun sədri, İstanbul millət vəkili Şamil Ayrım qardaş ölkələr arasında mövcud strateji münasibətlərin əhəmiyyətinə toxunaraq bu kimi tədbirlərin xalqlar arasında birlik və həmrəyliyin möhkəmlənməsinə xidmət etdiyini bildirib.
Türkiyənin Azərbaycandakı Fövqəladə və Səlahiyyətli Səfiri Birol Akgün isə qeyd etdi ki, Ramazan insanları bir araya gətirən, paylaşma və həmrəylik ruhunu gücləndirən xüsusi bir aydır.
Səmimi və dostluq mühitində keçən tədbir iştirakçılar arasında qarşılıqlı ünsiyyət, əməkdaşlıq və mənəvi dəyərlərin paylaşılması üçün geniş imkan yaradıb.