BOKT-lar daha böyük kapitala sahib olmalıdır – Mərkəzi Bank qaydaları sərtləşdirdi

Azərbaycan Mərkəzi Bankının (AMB) İdarə Heyətinin təsdiq etdiyi yeni “Bank olmayan kredit təşkilatlarının (BOKT) fəaliyyətinin prudensial tənzimlənməsi Qaydası”na əsasən, bu qurumlar üçün nizamnamə kapitalı tələbi əhəmiyyətli dərəcədə artırılıb.

Qaydalara əsasən, kommersiya hüquqi şəxsi formasında yaradılan BOKT-lar üçün nizamnamə kapitalı minimum 300 min manatdan 1 milyon manata, qeyri-kommersiya hüquqi şəxsi formasında yaradılan BOKT-lar üçün isə 30 min manatdan 100 min manata yüksəldilib.

BOKT-lar haqqında qısa məlumat

BOKT-lar kredit ittifaqları və digər kredit təşkilatlarını əhatə edir. Bu təşkilatlar depozitlər qəbul etmədən, yalnız pul formasında kreditlər verməklə fəaliyyət göstərir. Azərbaycanın kredit bazarında son illərdə BOKT-ların rolu əhəmiyyətli dərəcədə artıb. Əgər 2022-ci ildə ümumi kredit qoyuluşlarının 2,9%-i BOKT-lara məxsus idisə, 2023-cü ilin sonunda bu rəqəm 3,3%-ə, 2024-cü ilin oktyabrın 1-də isə 6%-ə çatıb.

Hazırda Azərbaycanda 96 BOKT fəaliyyət göstərir ki, onların 39-u kredit ittifaqıdır. Bu təşkilatlardan yalnız biri dövlətə, 95-i isə özəl sektora məxsusdur. Özəl BOKT-ların 15-i xarici kapitallıdır.

Maliyyə göstəriciləri və tələblərin sərtləşdirilməsi

2024-cü ilin oktyabrın 1-nə olan məlumata görə, BOKT-ların ümumi nizamnamə kapitalı 230,4 milyon manat, ümumi kapitalı isə 462,2 milyon manat təşkil edir. Bu təşkilatların kredit qoyuluşlarının dəyəri isə 688 milyon manatdır.

BOKT-ların kredit qoyuluşunun artması ilə onların fəaliyyətinə qoyulan tələblərin sərtləşdirilməsi zəruri addım kimi qiymətləndirilir. Qlobal təcrübə də göstərir ki, nizamnamə kapitalının artırılması kredit təşkilatlarının maliyyə dayanıqlığını və intizamını gücləndirir, həmçinin mümkün risklərin qarşısını alır.

Kapital artımı sayəsində bu təşkilatlar maliyyə öhdəliklərini daha effektiv şəkildə yerinə yetirəcək və risklərə qarşı daha dayanıqlı olacaq.

Mənbə: Sfera.az