COP29 çərçivəsində Qlobal İqlim Şəffaflığı üzrə nazirlərin dəyirmi masası keçirilir

COP29 çərçivəsində Qlobal İqlim Şəffaflığı üzrə nazirlərin iştirakı ilə keçirilən dəyirmi masada Azərbaycanın ekologiya və təbii sərvətlər naziri və COP29-un prezidenti Muxtar Babayev çıxış edib. O, Azərbaycanın bu həftə təqdim etməyə hazırlaşdığı İkiillik Şəffaflıq Hesabatını (BTR) və iqlim ambisiyalarını vurğulayıb. Babayev, şəffaflığın beynəlxalq proseslərdə etimadın artırılmasında və iqlim fəaliyyətlərinə dair məsuliyyətin gücləndirilməsində mühüm rol oynadığını bildirib.

BMT-nin İqlim Dəyişmələri üzrə Çərçivə Konvensiyasının (UNFCCC) icraçı katibinin müavini Nura Xamlaci, Paris Sazişi çərçivəsində Təkmilləşdirilmiş Şəffaflıq Sisteminin tam tətbiqini qeyd edərək, təqdim olunan BTR-lərin iqlim siyasətinin inkişafında kritik əhəmiyyətini vurğulayıb.

Yaponiyanın ətraf mühit naziri Keyitiro Asao isə Bakı Qlobal İqlim Şəffaflığı Platformasına dəstəyini ifadə edib və BTR-lərin Paris Sazişinin əsas komponentlərini yerinə yetirməkdəki roluna diqqət çəkib.

Mənbə: Trend.az