COP29-la bağlı qərar – SMS icazə və məhdudiyyətlər

OCOP29-un keçirildiyi dövrdə şəhərin əsas küçə və prospektlərində ciddi qadağaların tətbiqi nəzərdə tutulmur. Bu barədə COP29 Nəqliyyat Departamentinin rəhbəri Orxan Mahmudlu məlumat verib. O bildirib ki, noyabrın 11-12-13-də keçiriləcək Liderlər Sammiti zamanı müəyyən nəqliyyat tənzimləmələri həyata keçiriləcək:

“Ölkəyə gələcək dövlət və hökumət başçılarının hərəkəti ilə əlaqədar olaraq, hava limanından şəhərə və stadion istiqamətində müəyyən tənzimləmələr aparılacaq. Bu tənzimləmələr zamanı sıxlıqların yaranmaması üçün alternativ yollar təklif ediləcək. Şəhər sakinləri bu istiqamətlərdə nəqliyyatın rahatlığını təmin etmək üçün həmin alternativ yollardan istifadə etməyə yönləndiriləcək. Bu marşrutlar hava limanı-şəhər və şəhərin müxtəlif istiqamətlərini əhatə edir. Bununla bağlı yaxın zamanda ictimaiyyətə ətraflı məlumat veriləcək.”

Mahmudlu əlavə edib ki, nəqliyyatın tənzimlənəcəyi istiqamətlər arasında Neftçilər prospekti, Yusif Səfərov küçəsi, Heydər Əliyev prospekti və Zərifə Əliyeva küçəsi də daxil olacaq.

COP29 dövründə Bakı sakinlərinə evdən çıxmaqla bağlı heç bir məhdudiyyət tətbiq olunmayacaq.

Bu barədə COP29-un baş icraçı direktoru Elnur Soltanov açıqlama verib. O bildirib ki, şəhər sakinlərinin evdən çıxması üçün SMS icazəsi və ya digər qadağalar nəzərdə tutulmur:

“Bu məlumatlar dezinformasiyadır və sakinləri bu kimi yanlış məlumatlara inanmamağa, yalnız rəsmi qurumların açıqlamalarına etibar etməyə çağırırıq,” – deyə Soltanov vurğulayıb.