“Dövlət – biznes əməkdaşlığı və nəticələr” mövzusunda tədbir keçirilib

İqtisadiyyat Nazirliyi yanında Dövlət Vergi Xidmətində (DVX) “Dövlət-biznes əməkdaşlığı və nəticələr” mövzusunda genişmiqyaslı tədbir təşkil olunub.

Tədbirdə dövlət qurumlarının nümayəndələri, özəl sektor təmsilçiləri, biznes assosiasiyalarının üzvləri və müstəqil ekspertlər iştirak ediblər. Görüşün əsas məqsədi vergi qanunvericiliyi və inzibatçılığında edilən və ya nəzərdə tutulan dəyişikliklər, eləcə də dövlət və biznes sektorunun qarşılıqlı əməkdaşlıq formatının nəticələrini təqdim etmək və gələcək istiqamətləri müzakirə etmək olub.

Dövlət Vergi Xidmətinin rəis müavini Samirə Musayeva çıxışında qeyd edib ki, bu cür görüşlər, biznesin ehtiyac və çağırışlarını daha yaxından anlamaq və qanunvericilikdə səmərəli təkliflər formalaşdırmaq üçün mühüm platformadır.

Eyni zamanda, tədbir çərçivəsində dövlət və özəl sektorun nümayəndələri ilə birgə vergi qanunvericiliyinin tətbiqi sahəsində qarşıya çıxan məsələlər müzakirə edilib, həll yolları təklif olunub. Bu cür əməkdaşlıq həm biznes mühitinin inkişafına, həm də dövlət-biznes münasibətlərinin daha da güclənməsinə töhfə verəcək.

Tədbirin sonunda iştirakçılar arasında fikir mübadiləsi aparılıb, yeni təkliflər və prioritetlər müəyyənləşdirilib.

Mənbə: AZƏRTAC