DÖVLƏT KOMİTƏSİ AÇIQLAMA VERDİ AZAD OLUNAN ƏRAZİLƏRƏ QAYIDAN KÖÇKÜNLƏRƏ İKİQAT “ÇÖRƏKPULU” VERİLƏCƏK?
Sosial şəbəkələrdə azad edilən ərazilərə qayıdan məcburi köçkünlər onlara 3 il müddətinə ikiqat “çörəkpulu” verilməsi ilə bağlı məlumat paylaşıb. Qaçqınların və Məcburi Köçkünlərin İşləri üzrə Dövlət Komitəsi məsələyə münasibət bildirib.Vurğulanıb ki, fərdi qaydada sayğacların quraşdırılması və texniki istismarı mümkün olmayan keçmiş yataqxana, müalicə pansionatları və digər binalarda faktiki yaşayan məcburi köçkünlərin istifadə etdikləri təbii qaz, elektrik enerjisi, su və məişət tullantılarının daşınmasına görə haqlar müəyyən edilmiş normalar həddində dövlət hesabına mərkəzləşmiş qaydada ödənilir. Bu halda keçmiş məcburi köçkünlər üçün vahid aylıq müavinətin məbləği 33 manat təşkil edir.Hazırda fərdi qaydada sayğacların quraşdırılması və texniki istismarı mümkün olan yeni yaşayış sahələrində yaşayan, eləcə də sonradan işğaldan azad edilən ərazilərə köçürülənlər üçün bu məbləğ 60 manat təşkil edir.
