Əmtəə ixracı azalıb, idxalı artıb – AMB
Bu ilin doqquz ayında əmtəə ixracı 11,7 faiz azalaraq 19,3 milyard dollar təşkil edib.
BiznesTV Mərkəzi Banka istinadla xəbər verir ki, hesabat dövründə əsasən dünya bazarlarında xam neftin və təbii qazın qiymətlərinin əlverişli olması şəraitində neft-qaz sektoru üzrə ixracın həcmi 16,9 milyard dollar olub.
İxrac olunmuş neft-qaz məhsullarının (16,9 milyard dollar) 11,6 milyard dolları xam neftin, 4,9 milyard dolları təbii qazın, 0,4 milyard dolları isə neft emalı məhsullarının payına düşür. 2024-cü ilin 9 ayı üzrə qeyri-neft-qaz ixracı 0,3 faiz daralaraq 2,4 milyard dollar olub.
Cari ilin 9 ayı üzrə əmtəə idxalı 3,5 faiz artaraq 12,3 milyard dollar təşkil edib: o cümlədən istehlak mallarının idxalının ümumi dəyəri isə 4,9 milyard dollar olub, bunun da 1,6 milyard dolları ərzaq məhsullarının payına düşür. Qeyri-neft-qaz sektoru üzrə idxal 16,2 faiz artaraq 10,5 milyard dollar olub.
Qeyri-neft-qaz idxalının strukturunda bir çox məhsul üzrə artım müşahidə edilib:
- Turboreaktiv mühərriklər (2,7 dəfə),
- Kərə yağı (72,4 faiz),
- Kommutasiya qurğuları (40,5 faiz),
- Kran, klapan, boru kəməri armaturları (34 faiz),
- Yük avtomobilləri (29 faiz),
- Metallar (24,6 faiz),
- Bitki yağları (23,6 faiz),
- Mebel məhsulları (21,9 faiz),
- Elektrik maşınlar və aparatura (21,6 faiz).
Eyni zamanda bəzi məhsulların idxalında azalma qeydə alınıb:
- Uçuş aparatları (90,4 faiz),
- Gəmilər, qayıqlar və üzən konstruksiyalar (61,8 faiz),
- Traktorlar (32,9 faiz),
- Əczaçılıq məhsulları (12,4 faiz).
İdxalın strukturunda xarici investisiyalar hesabına gətirilmiş maşın-avadanlıqların xüsusi çəkisi 3,3 faiz təşkil edərək 0,4 milyard dollar olub.
