FERMERLƏRƏ YENİ GÜZƏŞT

FERMERLƏRƏ YENİ GÜZƏŞT BİRİLLİK ƏKİN APARANLARIN KREDİT FAİZİNİ DÖVLƏT ÖDƏYƏCƏK

Azərbaycanda birillik əkin aparan fermerlər üçün yeni güzəştli maliyyələşdirmə mexanizmi tətbiq ediləcək. Belə ki, əkin məqsədilə götürülən kreditlər üzrə illik faiz dərəcəsinin 19 %-ə qədər olan hissəsi dövlət büdcəsi hesabına maliyyələşdiriləcək və fermerlər kredit müddətinin sonunda yalnız əsas borcu geri ödəyəcəklər. Kənd Təsərrüfatı Nazirliyinin məlumatına görə əsas məqsəd kredit faizlərini dövlətin qarşılaması yolu ilə aqrotexniki xidmətlər üçün maliyyə əlçatanlığını yaxşılaşdırmaq və aqrar sahənin inkişafına töhfə verməkdir.Güzəştli kreditlər çəltik, qarğıdalı, darı, sorqo, digər dənli və dənli-paxlalı bitkilər -buğda, arpa, çovdar, vələmir, qarabaşaq, noxud, lobya, mərci və s., həmçinin günəbaxan, kartof, tərəvəz və bostan bitkiləri, eləcə də texniki bitkilər – pambıq, şəkər çuğunduru, tütün və soya əkən fermerlərə veriləcək.Yeni mexanizm çərçivəsində kənd təsərrüfatı istehsal vasitələrinin, o cümlədən mineral gübrələrin, biohumusun, sertifikatlı toxumların və pestisidlərin alınması, eləcə də aqrotexniki xidmətlərdən istifadə məqsədilə müddəti 1 ili keçməyən kreditlər üzrə hesablanan faizləri Aqrar Kredit və İnkişaf Agentliyi ödəyəcək. Bu isə o deməkdir ki, fermerlər kreditin yalnız əsas məbləğini banka qaytaracaqlar.