İşsizlər üçün nəzərdə tutulan 17 milyon kimlərə veriləcək?

İşsizlikdən Sığorta Fondu: 2025-ci il Büdcəsi Təsdiq Edildi

Biznes TV Milli.Az-a istinadən xəbər verir ki, bunu Milli Məclisin deputatı, iqtisadçı Vüqar Bayramov sosial media hesabında yazıb.

İşsizlikdən Sığorta Fondunun 2025-ci il üçün büdcə layihəsi Milli Məclisdə birinci oxunuşda qəbul edilib. Fondun gəlir və xərcləri bərabər olaraq 260,7 milyon manat məbləğində proqnozlaşdırılır. Bu vəsaitin 17 milyon manatı işsizliyə görə sığorta ödənişlərinə ayrılacaq.

Milli Məclisin deputatı, iqtisadçı Vüqar Bayramovun sözlərinə görə, ödənişlər əmək müqaviləsi ilə çalışan və qanunla müəyyən edilmiş hallarda iş yerlərini itirən vətəndaşlara şamil edilir.

Ödəniş, Əmək və Əhalinin Sosial Müdafiəsi Nazirliyinin elektron informasiya sistemində işsiz kimi qeydiyyatdan keçən şəxslərə, lazımi sənədləri təqdim etdikdən sonra təyin olunur. Əsas tələblərdən biri isə sığorta stajı ilə bağlıdır.

İşsizlik sığortası məbləği, itirilmiş orta aylıq əməkhaqqının 50%-i qədər hesablanır, lakin bu məbləğ ölkə üzrə orta aylıq əməkhaqqı və minimum sığorta ödənişi həddləri arasında olmalıdır.