KİÇİK BİZNESDƏN BÖYÜK İQTİSADİ GÜCƏ
KOBİA-NIN YARANMASINDAN 8 İL ÖTÜR
Azərbaycan Prezidentinin Fərmanı ilə yaradılan Kiçik və Orta Biznesin İnkişafı Agentliyinin fəaliyyətə başlamasından 8 il ötür. Agentlik bu müddətdə KOB sektorunun inkişafına dövlət dəstəyinin əsas institusional dayaqlarından birinə çevrilib. KOBİA tərəfindən ölkədə sahibkarlara xidmətin əlçatanlığı üçün geniş infrastruktur qurulub. Hazırda Bakı, Xaçmaz, Yevlax və Şuşada fəaliyyət göstərən KOB evlərində sahibkarlara dövlət və özəl qurumlar tərəfindən ümumilikdə 1,4 milyon xidmət göstərilib. Gəncə KOB evinin də yaxın günlərdə açılması gözlənilir.Sahibkarların bilik və bacarıqlarının artırılması istiqamətində 64 800 sahibkara 5 200 təlim, 10 000-ə yaxın məsləhət xidməti təqdim olunub. 48 şəhər və rayonda fəaliyyət göstərən “KOB dostu” şəbəkəsi isə sahibkarların problemlərinin operativ həllinə dəstək verib. Ötən 8 ildə KOB-lar üçün yeni dəstək mexanizmləri yaradılıb. 240-a yaxın startap üçün vergi güzəşti təmin edən “Startap” şəhadətnaməsi verilib, 129 layihəyə 2,2 milyon manat qrant ayrılıb. 2 000-ə yaxın KOB-un yerli və beynəlxalq sərgilərdə iştirakı təmin olunub, iki KOB klasteri – Quba və Sumqayıtda yaradılıb. KOB-ların rəqəmsallaşdırılması istiqamətində e-KOB evi portalı istifadəyə verilib və 2026-cı ildən tam fəaliyyət göstərəcək. Bu dövrdə KOB-ların iqtisadi göstəricilərində də nəzərəçarpan artım qeydə alınıb. Onlarln sayı artaraq 424 000-i keçib, əlavə dəyər 2 dəfədən çox artaraq 21,1 mlrd manata çatıb, KOB-larda məşğul olanların sayı isə 417 800 nəfəri ötüb. Agentliyin fəaliyyəti beynəlxalq səviyyədə də qiymətləndirilib – OECD və Avropa İttifaqı hesabatlarında KOBİA yüksək nəticələrlə fərqlənib.
