Prezident Ərdoğan: Bakıda keçirilən COP29-da iqlim dəyişikliklərinin qorxuducu həddə çatdığını bir daha gördük

Prezident Ərdoğan: İqlim dəyişiklikləri qorxuducu həddə çatıb

Türkiyə Prezidenti Rəcəb Tayyib Ərdoğan Bakıda keçirilən COP29 Liderlər Zirvəsində iqlim dəyişikliklərinin təhlükəli səviyyəyə çatdığını vurğulayıb. O bildirib ki, ötən əsrin materialist yanaşmaları yalnız insan həyatını deyil, ətraf mühiti də məhv edib. Ərdoğan, dünyada davam edən istismar sisteminin dəyişməsinin zəruriliyini və insanla ətraf mühitin dəyərləndirilmədən qlobal sabitliyin mümkün olmayacağını qeyd edib.

Prezident İstanbulda keçirilən I Enerji Forumunda çıxışında enerji təhlükəsizliyinin əhəmiyyətinə toxunaraq, Türkiyənin enerji asılılığını azaltmaq və bərpa olunan enerjiyə keçidi prioritet etdiyini bildirib. “2023-cü ildə təbii qaz idxalımız 50 milyard kubmetrə çatdı, lakin daxili istehsalımız artmaqdadır. Sakarya qaz sahəsində gündəlik istehsalımız 7 milyon kubmetr olub, 2026-cı ilə bu göstərici 20 milyon kubmetrə çatdırılacaq.”

Energetika naziri Alparslan Bayraktar isə çıxışında Türkiyənin 2035-ci ilədək külək və günəş enerjisindəki gücünü dörd dəfə artırmağı hədəflədiyini açıqlayıb. Tədbirdə Azərbaycanı energetika naziri Pərviz Şahbazov təmsil edib.

Mənbə: AZƏRTAC