Qızılın qiyməti yeni rekord səviyyəyə – 2782 dollara yüksəlib.

ABŞ prezident seçkiləri ərəfəsində siyasi qeyri-müəyyənlik və mərkəzi bankların faiz siyasətində gözləntilərin təsiri ilə “təhlükəsiz liman” kimi qızıla olan tələbat artıb. Xüsusilə ABŞ və Yaponiyada siyasi qeyri-müəyyənlik, FED-in növbəti iclasına dair gözləntilər investorları qızıl alışına təşviq edir.

FED-in noyabrın 6-7-də keçiriləcək iclası öncəsi inflyasiya və əmək haqqı göstəricilərinin açıqlanması gözlənilir ki, bu da FED-in 2025-ci ilə qədərki pul siyasətinə dair işarələr verə bilər. Yaponiyada isə Liberal Demokrat Partiyasının koalisiya tərəfdaşlarının parlament çoxluğunu itirməsi əlavə qeyri-müəyyənlik yaradır.

Bu il qızıl, mərkəzi bankların alışları və Yaxın Şərq ilə Ukraynada davam edən münaqişələr səbəbindən 30 faizdən çox bahalaşıb. ABŞ prezidentliyinə iddialı olan Tramp və Harris fərqli iqtisadi siyasətlər təklif etdiklərindən, bazarda əlavə qeyri-müəyyənliklər yaranır.