“Radiasiya və iqlim dəyişikliyi: yeni çağırışlar” tədbiri COP29 çərçivəsində keçirilib

COP29 (BMT İqlim Dəyişmələri üzrə Çərçivə Konvensiyasının Tərəflər Konfransı) çərçivəsində Azərbaycanın Fövqəladə Hallar Nazirliyi (FHN) Nüvə və Radioloji Fəaliyyətin Tənzimlənməsi üzrə Dövlət Agentliyinin təşkilatçılığı ilə “Radiasiya və iqlim dəyişikliyi: yeni çağırışlar” mövzusunda tədbir keçirilib.

Tədbirə Azərbaycanın müxtəlif nazirlikləri, Dövlət Su Ehtiyatları Agentliyi və Atom Enerjisi üzrə Beynəlxalq Agentlik (AEBA) nümayəndələri qatılıb.

FHN nümayəndəsi Nicat Əliyev çıxışında radioloji fəaliyyətin təhlükəsizliyinin təminatı, infrastrukturların gücləndirilməsi və radioaktiv tullantıların idarə edilməsi sahəsindəki işləri vurğulayıb. O, Azərbaycanın nüvə və radiasiya texnologiyalarının tətbiq sahələrini genişləndirərək tibb, kənd təsərrüfatı və məhsul sterilizasiyası kimi sahələrdə istifadə etdiyini bildirib.

Son illərdə radiasiya təhlükəsizliyi üçün ölkə üzrə mütəmadi monitorinqlər aparıldığı, radionuklidlərin təyini üçün müasir sistemlərin tətbiq edildiyi qeyd olunub. Eyni zamanda, modul tipli kiçik nüvə reaktorlarının karbon emissiyalarını azaltmadakı potensialı müzakirə edilib.

Tədbirdə AEBA nümayəndəsi Vey Huanq və digər yerli qurumların təmsilçiləri mövzunun əhəmiyyətini vurğulayıb, gələcəkdə bu sahədə əməkdaşlıq perspektivlərini müzakirə ediblər.

Mənbə: AZƏRTAC