Şimali Kipr Türk Respublikasının yaranmasının 41-ci ildönümü münasibətilə rəsmi qəbul keçirilib

Noyabrın 28-də Baku Marriott Hotel Boulevard-da Şimali Kipr Türk Respublikasının (ŞKTR) yaranmasının 41-ci ildönümü münasibətilə rəsmi qəbul təşkil edilib.

ŞKTR Bakı nümayəndəliyinin təşkilatçılığı ilə keçirilən tədbirdə Türkiyə Respublikasının Azərbaycandakı səfiri Dos. Dr. Cahit Bağcı və Səfirliyin müşavirləri, Azərbaycan Milli Məclisinin deputatları, dövlət və hökumət rəsmiləri, xarici diplomatik nümayəndəliklərin əməkdaşları, qeyri-hökumət təşkilatlarının nümayəndələri, Azərbaycan-Türkiyə İş Adamları Birliyinin sədri Mürsəl Rüstəmov və nümayəndə heyəti, mədəniyyət və incəsənət xadimləri, media nümayəndələri və iş adamları iştirak ediblər.

Tədbirin açılışında ŞKTR Bakı nümayəndəliyinin rəhbəri Ufuk Turganer Azərbaycan xalqını və Prezident İlham Əliyevi ölkəmizin beynəlxalq COP29 iqlim konfransına yüksək səviyyəli ev sahibliyi münasibətilə təbrik edib. O, Şimali Kiprin müstəqilliyinin dost və qardaş Azərbaycanda qeyd edilməsinin qürurverici olduğunu vurğulayıb. Ufuk Turganer ölkəsinin Türkiyənin dəstəyi ilə daha da inkişaf edəcəyinə inamını ifadə edib.

Milli Məclisin Azərbaycan-Şimali Kipr parlamentlərarası əlaqələr üzrə işçi qrupunun sədri Cavanşir Feyziyev çıxışında Kipr türklərinin ortaq dəyərlərə və türk kimliyinə dərin bağlılığı ilə böyük Türk dünyasının ayrılmaz parçası olduğunu qeyd edib. O vurğulayıb ki, Azərbaycan türk dövlətləri arasında siyasi və iqtisadi əlaqələrin inkişafına, təhlükəsizlik sahəsində əməkdaşlığa mühüm töhfələr verərək, türk birliyinin möhkəmlənməsinə daima dəstək olub.

Rəsmi çıxışlardan sonra tədbir ziyafətlə davam edib.