“Azərlotereya” Xankəndidə “Qış nağılı”nda iştirak edir
“Azərlotereya” ASC, Qarabağın bərpası və dirçəlişi naminə həyata keçirilən sosial və mədəni layihələrdə iştirakını davam etdirir. 34 ildən sonra ilk dəfə Xankəndi şəhərində Dünya Azərbaycanlılarının Həmrəylik Günü və Yeni il bayramı münasibətilə təşkil olunan “Qış nağılı” bayram yarmarkası bu dəstəyin növbəti nümunəsidir.
Yarmarka Xankəndi, Ağdərə və Xocalı rayonlarında Azərbaycan Respublikası Prezidentinin xüsusi nümayəndəliyinin təşkilatçılığı ilə Zəfər meydanında baş tutub. Tədbirin əsas sponsorlarından biri olan “Azərlotereya” ASC, Qarabağda sosial və iqtisadi canlanmaya töhfə vermək, eyni zamanda genişmiqyaslı yenidənqurma işlərinə diqqət çəkmək məqsədini güdür.
Yarmarkada təqdim olunanlar
“Qış nağılı” bayram yarmarkası, yerli istehsalçıların təqdim etdiyi müxtəlif məhsulları, bayrama uyğun dekorasiyaları və xüsusi konsert proqramı ilə ziyarətçilərə unudulmaz bayram təəssüratı bəxş edib. Tədbir həm Xankəndi sakinləri, həm də şəhəri ziyarət edənlər üçün birlik, həmrəylik və sevinc simvoluna çevrilib. Yarmarka 2024-cü il dekabrın 29-dan 2025-ci il yanvarın 4-dək davam edəcək.
“Azərlotereya”nın Qarabağa töhfələri
“Azərlotereya” ASC, Qarabağın inkişafı istiqamətində həyata keçirilən işlərə böyük dəstək göstərməyə davam edir. Aşağıdakı layihələr bu səylərin bir hissəsidir:
- “Hər şey Qarabağ üçün” layihəsi: Tirajlı lotereya biletlərinin satışından əldə edilən vəsaitin bir hissəsi Qarabağ Dirçəliş Fonduna ianə edilir.
- Minalardan təmizləmə dəstəyi: İşğaldan azad edilmiş ərazilərin minalardan təmizlənməsi üçün xüsusi təlim keçmiş itlərin alınması maliyyələşdirilib.
- “Əmanətə Sədaqət” layihəsi: 2022-ci ildən həyata keçirilən bu layihə indiyədək 150 şəhid əmanətini əhatə edib. Türkiyədəki dövlət ali təhsil müəssisələrinin tələbəsi olan şəhid övladlarının təhsil haqqı və yaşayış xərcləri, Azərbaycandakı ali təhsil alan şəhid övladlarının yaşayış xərcləri layihə çərçivəsində qarşılanır.
“Azərlotereya” ASC, Qarabağın bərpası və inkişafına dair dəstəyini bundan sonra da davam etdirəcəyini bəyan edib.
Mənbə: AZƏRTAC
