Dünyanın Ən Dəyərli Avtomobil Şirkətləri: Tesla Birinci Yerdə
Dünyanın ən dəyərli 50 avtomobil istehsalçısı siyahısına bazar dəyəri 1 milyard dolları aşan şirkətlər daxil olub. Siyahıya ABŞ-ın elektrikli avtomobil istehsalçısı Tesla liderlik edir. Tesla, 1,37 trilyon dollarlıq bazar dəyəri ilə birinci yerdə qərarlaşıb. Şirkət elektrikli avtomobillərin dizaynı, istehsalı və satışı ilə məşğul olur.
İkinci yeri Toyota 240 milyard dollar, üçüncü yeri isə Xiaomi 111,9 milyard dollarla tutur. Dördüncü yerdə BYD (110,1 milyard dollar), beşinci yerdə isə Ferrari (78,2 milyard dollar) qərarlaşıb. İlk onluqda həmçinin Porsche, Mercedes-Benz, General Motors, BMW və Volkswagen kimi tanınmış avtomobil istehsalçıları yer alır.
Bu barədə Biznes TV companiesmarketcap.com-a istinadən xəbər verir.
Dünya avtomobil sənayesi hazırda elektromobil istehsalının artması ilə böyük transformasiya mərhələsindədir. Ənənəvi avtomobil istehsalçıları bazar paylarını qorumaq üçün innovativ modellər və sürücüsüz texnologiyalara sərmayə yatırdıqları halda, Çin şirkətlərinin bu sahədəki sürətli yüksəlişi diqqət çəkir.
Siyahıda yer alan şirkətlərin 17-si Çin, 8-i Yaponiya, 6-sı Amerika, 4-ü Almaniya, 3-ü isə Hindistan mənşəlidir. Bundan əlavə, Cənubi Koreya, İsveç, Türkiyə və Tayvandan da iki şirkət siyahıya daxildir.
