ƏN BÖYÜK QAZANCI KRİPTOVALYUTADAN GƏLDİ
ƏN BÖYÜK QAZANCI KRİPTOVALYUTADAN GƏLDİ TRAMPIN SƏRVƏTİ BİR İLDƏ 1,4 MİLYARD DOLLAR ARTDI
ABŞ Prezidenti Donald Trampın sərvəti son bir ildə əhəmiyyətli dərəcədə artıb.
Yeniavaz.com xəbər verir ki, “Forbes” jurnalının 2026-cı ilin mart ayında dərc etdiyi hesablamalara əsasən, ABŞ prezidentinin xalis sərvəti hazırda 6,5 milyard dollar təşkil edir. Bu göstərici 2025-ci ilə müqayisədə təxminən 1,4 milyard dollar çoxdur. Məlumata görə, sərvət artımının əsas səbəbləri kriptovalyuta layihələrindən əldə olunan gəlirlər, lisenziyalaşdırma biznesinin genişlənməsi və hüquqi öhdəliklərin azalması olub.
Nəşr bildirir ki, Trampın ən böyük sərvət mənbəyi kriptovalyuta aktivləri və nağd vəsaitdir. Bu kateqoriyanın ümumi dəyəri 2,1 milyard dollar qiymətləndirilir. Həmin məbləğin təxminən 1,3 milyard dollarını likvid aktivlər təşkil edir. Trampın qolf klubları və kurortlarının ümumi dəyəri isə 1,5 milyard dollar hesablanır. Bu aktivlər arasında ən yüksək qiymətləndirilən obyekt Mar-a-Lago malikanəsidir. Onun dəyərinin 564 milyon dollar olduğu bildirilir. ABŞ-dəki qolf klubları şəbəkəsinin ümumi dəyəri isə 549 milyon dollar təşkil edir.Daşınmaz əmlak investisiyalarının ümumi dəyəri 1,2 milyard dollar olaraq göstərilir. Bu siyahıya “Trump Tower”, “40 Wall Street” və Nyu-Yorkla San-Fransiskodakı müxtəlif ofis binaları daxildir.
Bununla yanaşı, Trampın “Trump Media & Technology Group” şirkətindəki payının dəyəri 1,2 milyard dollar qiymətləndirilir. Şirkət “Truth Social” sosial şəbəkəsinin ana qurumudur. Lakin son bir ildə bu aktivin dəyərinin 1,3 milyard dollardan çox azaldığı vurğulanır.
“Forbes” qeyd edir ki, Tramp brendi altında fəaliyyət göstərən lisenziyalaşdırma biznesi, şəxsi təyyarələr və pensiya fondları daxil olmaqla digər aktivlərin ümumi dəyəri təxminən 551 milyon dollardır. Xüsusilə yeni beynəlxalq müqavilələr hesabına lisenziyalaşdırma və idarəetmə biznesindən 533 milyon dollar gəlir əldə edildiyi bildirilir.
