**ÖLKƏYƏ İDXALDA CİDDİ AZALMADÖVLƏT GÖMRÜK KOMİTƏSİ SƏBƏBİNİ AÇIQLADI
2026-cı ilin birinci yarısında Azərbaycana idxal olunan mal və məhsulların dəyəri ötən ilin eyni dövrü ilə müqayisədə 3 milyard 181 milyon dollar və ya 27,6% azalaraq 8 milyard 341,1 milyon dollara düşüb. Dövlət Gömrük Komitəsinin məlumatına görə kəskin azalmanın əsas səbəbi dövlətin idxalı azaltması olub. Belə ki, idxal olunan məhsulların 643,6 milyon dolları dövlət sektorunun, 6 milyard 969,9 milyon dolları özəl sektorun, 727,6 milyon dolları fiziki şəxslərin payına düşüb. Ötən ilin birinci yarısı ilə müqayisədə dövlət sektoru idxalı 3 milyard 490,9 milyon dollar, fiziki şəxslər 285,1 milyon dollar azaldıb, özəl sektor isə 595 milyon dollar artırıb. Məlumat üçün bildirək ki, bu ilin birinci yarısında Azərbaycanın xarici ticarət dövriyyəsi illik müqayisədə 261 milyon dollar və ya 1,1% artaraq 24 milyard 661,3 milyon dollara çatıb. Bunun 16 milyard 320,2 milyon dolları ixracın, 8 milyard 341,1 milyon dolları idxalın payına düşüb. Ötən ilin birinci yarısı ilə müqayisədə ixracın həcmi 3 milyard 442 milyon dollar artıb, idxalın həcmi isə 3 milyard 181 milyon dollar azalıb. Xarici ticarətin müsbət saldosu 6 milyard 623 milyon dollar, yaxud da 5,9 dəfə artaraq 7 milyard 979,1 milyon dollara bərabər olub.
