“Trendyol” 2024-cü ildə Azərbaycanda Rekord Alış-Veriş Göstəriciləri Əldə Etdi

Dünyanın aparıcı e-ticarət platformalarından biri və Türkiyənin ən böyük onlayn ticarət şirkəti olan “Trendyol”, 2024-cü il üzrə Azərbaycandan olan müştərilərinin alış-veriş göstəricilərini açıqlayıb.

Biznes TV xəbər verir ki, ötən il ərzində “Trendyol” platformasından Azərbaycana 20 milyondan çox məhsul göndərilib. Qadın geyimləri, idman ayaqqabıları, kosmetika, dəriyə qulluq vasitələri və ev və mətbəx əşyaları ən çox sifariş olunan məhsullar arasında yer alıb. Sifarişlərin 60%-dən çoxunu geyim məhsulları təşkil edib.

Ən aktiv müştərilər Bakı, Abşeron və Sumqayıtda yaşayır. 2024-cü ildə “Trendyol” platformasından alış-veriş edən azərbaycanlı müştərilərin 70%-ni qadınlar təşkil edib.

Hazırda Azərbaycanda 2 milyondan çox insan “Trendyol”dan aktiv şəkildə istifadə edir. Platformanın mobil tətbiqi isə son iki ildə ölkədə ən çox yüklənən mobil tətbiqlərdən biri olub.

Eyni zamanda, “Trendyol” Bakı Biznes Klubu tərəfindən “İlin ən yaxşı e-ticarət platforması” mükafatına layiq görülüb.

Platforma hazırda tekstil məhsullarından elektronikaya, uşaq qidalarından ev dekorasiyasına qədər 1 500-dən çox kateqoriyada məhsul təklif edir.