“Uzbekistan Airways” Avropaya Uçuş Marşrutlarını Dəyişdirdi

“Uzbekistan Airways” aviaşirkəti Avropaya uçuşlarında Rusiya ərazisi üzərindən keçidlərdən imtina edib.

Özbəkistan KİV-lərinin məlumatına görə, bu barədə şirkətin İdarə Heyətinin sədri Şuxrat Xudaykulov məlumat verib. Qərarın qəbulunda əsas səbəb Avropa Aviasiya Təhlükəsizliyi Agentliyinin (EASA) Rusiyanın Avropa hissəsi üzərindən uçuşları təhlükəli kimi qiymətləndirən hesabatı olub.

Avropaya uçuşlar artıq Azərbaycan və Türkiyə üzərindən təşkil olunur. Şirkət rəhbəri bildirib ki, yeni marşrutlar uçuş müddətini 30-40 dəqiqə uzatsa da və əlavə xərc yaratsa da, bu, fors-major vəziyyət kimi dəyərləndirilir. Əlavə xərclərə baxmayaraq, sərnişinlər üçün tariflərin artırılmayacağı vurğulanıb.

Bundan əvvəl, Azərbaycan Hava Yollarına (AZAL) məxsus Bakı-Qroznı aviareysini yerinə yetirən sərnişin təyyarəsinin qəzası Özbəkistanda diqqət mərkəzində olub. Qəza dekabrın 25-də Qazaxıstanın Aktau şəhəri yaxınlığında baş verib. Göyərtədə olan 67 nəfərdən 38-i həlak olub, 29 nəfər sağ qalıb. İlkin məlumatlara görə, təyyarə Rusiyanın Qroznı üzərindəki hava məkanında fiziki və texniki xarici müdaxilə nəticəsində qəzaya uğrayıb.

Bu hadisədən sonra Özbəkistan hökuməti təhlükəsizlik məsələlərini yenidən nəzərdən keçirmək üçün xüsusi komissiya yaradıb. Komissiyanın tərkibinə Müdafiə Nazirliyi, Nəqliyyat Nazirliyi və digər qurumların nümayəndələri daxil edilib.

“Uzbekistan Airways”in marşrut dəyişikliyi sərnişinlərin təhlükəsizliyini ön planda tutduğunu bir daha göstərir. Şirkət rəhbərliyinin sözlərinə görə, sərnişinlərin rahatlığı üçün yeni marşrutlarla bağlı bütün texniki və əməliyyat tədbirləri görülür.