Volkswagen-in İşçiləri Xəbərdarlıq Tətilinə Hazırlaşır

Volkswagen-in işçiləri gələn həftə tətilə çıxmağa hazırlaşır.

BiznesTV Marja-ya istinadən xəbər verir ki, avtomobil nəhəngi Volkswagen ilə “IG Metall” həmkarlar ittifaqı arasında əməkhaqları və iş şərtləri üzrə aparılan danışıqlar razılıqla nəticələnməyib. Şirkət elektrik avtomobil bazarındakı zəifləmə və artan rəqabət səbəbilə xərcləri azaltmaq niyyətindədir.

“IG Metall” sözçüsü açıqlamasında, işçilərin bazar ertəsi xəbərdarlıq tətilinə başlayacağını və bu müddətdə gündə bir neçə saat ərzində işin dayandırılacağını bildirib. Tətillərin nə qədər davam edəcəyi isə danışıqların gedişatından asılı olacaq.

Volkswagen-in Almaniyada 300 minə yaxın işçisi çalışır və şirkətin 10 zavodu fəaliyyət göstərir. Planlaşdırılan tətil Wolfsburg, Braunschweig, Hannover, Salzgitter, Emden və Kassel kimi əsas müəssisələri və bəzi törəmə şirkətləri əhatə edərək təxminən 120 min işçini əhatə edəcək.

İşçilərin tətil hüququnun qarşısını alan əvvəlki müqavilənin müddəti 30 noyabrda sona çatır. Danışıqların növbəti mərhələsi isə dekabrın 9-da keçiriləcək.

Bu tətil, işçilərin öz hüquqlarını müdafiə etmək üçün atdığı mühüm addım kimi qiymətləndirilir. Danışıqların müsbət nəticələnib-nəticələnməyəcəyi isə qarşıdakı günlərdə bəlli olacaq.