Azad olunmuş ərazilərə dekabr ayı üçün avtobus biletləri satışa çıxarılır

Rəqəmsal İnkişaf və Nəqliyyat Nazirliyinin tabeliyindəki Azərbaycan Yerüstü Nəqliyyat Agentliyi (AYNA) tərəfindən işğaldan azad edilmiş ərazilərə təşkil olunan müntəzəm avtobus reyslərinə dekabr ayı üçün biletlər 25 noyabr 2024-cü il, saat 11:00-da satışa çıxarılacaq.

Bakı-Şuşa, Əhmədbəyli-Şuşa, Bakı-Ağdam və Bərdə-Ağdam reyslərinə biletlər www.yolumuzqarabaga.az portalından, Bakı-Xocalı-Xankəndi-Şuşa, Bərdə-Xankəndi və Bakı-Laçın reyslərinə isə biletim.az üzərindən əldə edilə bilər.

Biletlərin alınması üçün vətəndaşlar şəxsiyyət vəsiqələrindəki məlumatları sistemə daxil etməli və alınan bilet yalnız eyniləşdirilmiş şəxsin istifadəsində olmalıdır. Biletlərin başqasına ötürülməsi mümkün deyil.

Xatırladaq ki, işğaldan azad olunmuş ərazilərə ilk müntəzəm avtobus reysləri 2022-ci il yanvarın 24-də istifadəyə verilib. İndiyədək 1207 reys həyata keçirilib və 36,208 sərnişin bu ərazilərə səfər edib.

Mənbə: Azərbaycan Yerüstü Nəqliyyat Agentliyi (AYNA).