Mikayıl Cabbarov Səudiyyə Ərəbistanında investisiyaların təşviqini müzakirə edib

Azərbaycan və Səudiyyə Ərəbistanı ticarət və investisiyaların təşviqi üzrə əməkdaşlıq imkanlarını müzakirə edib.

İqtisadiyyat Nazirliyindən verilən məlumata görə, müzakirələr nazir Mikayıl Cabbarovun Səudiyyə Ərəbistanı Krallığına səfəri çərçivəsində baş tutan görüşlərdə aparılıb.

Nazir Mikayıl Cabbarov, Səudiyyə Ərəbistanı Krallığının investisiya naziri Xalid bin Əbdüləziz Əl-Falihlə görüşüb. Görüşdə Azərbaycan-Səudiyyə Ərəbistanı iqtisadi əlaqələrinin inkişaf etdiyi, biznes dairələri arasında işgüzar münasibətlərin genişləndiyi vurğulanıb. Tərəflər iqtisadiyyatın şaxələndirilməsi, ticarət və investisiyaların təşviqi istiqamətində əməkdaşlıq imkanlarını müzakirə ediblər.

Səudiyyə Ərəbistanının energetika naziri, şahzadə Əbdül Əziz bin Salman Əl-Səudla keçirilən görüşdə “yaşıl enerji” gündəliyinin prioritet istiqamətləri müzakirə edilib. Görüş zamanı bu sahədə birgə fəaliyyətin uğurlu nəticələri və hər iki ölkə üçün faydaları barədə fikir mübadiləsi aparılıb. Enerji keçidinə dair potensial layihələr üzrə əməkdaşlığın genişləndirilməsi məsələləri də müzakirə olunub.

Nazirlikdən bildirilib ki, bərpa olunan enerjinin səmərəliliyinin artırılması və alternativ enerji mənbələrinin enerji sektorundakı payının genişləndirilməsi Azərbaycanın iqtisadi inkişaf strategiyasının əsas istiqamətlərindən biridir. Bu kontekstdə Səudiyyə Ərəbistanı ilə əməkdaşlığa xüsusi önəm verildiyi vurğulanıb.