Ətriyyat-kosmetika biznesilə məşğul olan sahibkarlar Dövlət Xidmətinə dəvət olunublar

İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidməti istehlak bazarında satılan ətriyyat-kosmetika vasitələri ilə bağlı müşahidə olunan pozuntuların aradan qaldırılması və dövlət-özəl tərəfdaşlığı çərçivəsində müzakirələrin aparılması məqsədilə maarifləndirici görüş keçirib. Görüşdə ətriyyat-kosmetika vasitələrinin satışını həyata keçirən sahibkarlar iştirak edib.

Dövlət Xidməti sahibkarlara ətriyyat-kosmetika məhsullarının üzərində Azərbaycan dilində zəruri məlumatların yerləşdirilməsi, məhsulların yararlılıq müddətinin göstərilməsi və qanunvericiliyin digər tələbləri barədə məlumat verib. Həmçinin Azərbaycan Respublikası Nazirlər Kabinetinin təsdiq etdiyi “Azərbaycan Respublikasında ticarət, ictimai iaşə, məişət və digər növ xidmət Qaydaları” ilə bağlı əsas məqamlar sahibkarların diqqətinə çatdırılıb.

Görüş zamanı istehlakçıların daha çox qarşılaşdığı problemlər, bazarda mövcud olan çatışmazlıqlar və onların həlli yolları ətraflı müzakirə olunub. Sahibkarlara istehlakçı hüquqlarının qorunması, müştəri məmnuniyyətinin təmin edilməsi və qanunvericiliyin tələblərinə ciddi əməl olunması ilə bağlı tövsiyələr verilib. Eyni zamanda sahibkarların sualları cavablandırılıb və praktiki məsələlərlə bağlı fikir mübadiləsi aparılıb.

Mənbə: İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidməti