“Azərpoçt” yeni veb-saytını istifadəyə verib
“Azərpoçt” MMC-nin yenilənmiş veb-saytı istifadəyə verilib
2021-ci ildən yenilənmə mərhələsinə keçid edən milli poçt operatoru “Azərpoçt” MMC müasir dizaynda hazırlanmış yenilənmiş veb-saytını istifadəyə verib.
Veb-sayt istifadəçilərə maraqlı olan bütün məlumatları asanlıqla əldə etmək imkanı yaradır. Sayt üç dildə – Azərbaycan, rus və ingilis dillərində fəaliyyət göstərəcək və geniş təhlil edilmiş müştəri tələbləri əsasında hazırlanıb.
Saytın əsas funksionallıqları:
- Müştəri suallarına sürətli cavablar: Beynəlxalq və ölkədaxili göndərişlər, daşınma şərtləri, qaydalar, maliyyə və poçt kalkulyatoru kimi xidmətlər.
- Poçt şöbələrinin tapılması: İstifadəçilər öz ünvanlarına xidmət göstərən poçt şöbələrini müəyyən edə, digər əlaqəli ünvanları görə və coğrafi koordinatlar vasitəsilə şöbəyə ən yaxın marşrutu öyrənə biləcəklər.
- Canlı söhbət: Sayt vasitəsilə istifadəçilər dərhal “canlı söhbət” xidmətinə qoşularaq suallarını ünvanlaya bilərlər.
- Xidmətlərə asan keçid: İstifadəçilər “Azərpoçt”un üç əsas xidmət sahəsi – poçt, maliyyə və rəqəmsal xidmətlər haqqında məlumatları əldə edəcək, həmçinin karqo, sürətli poçt və marka xidmətlərinə keçid edəcəklər.
Qeyd olunub ki, bu yenilənmiş veb-sayt “Azərpoçt” MMC-nin cari ildə həyata keçirdiyi üçüncü rəqəmsal layihədir. Daha əvvəl qurum müştərilərinə “İnternet bankçılıq” və “AzPost Mobile” kimi rəqəmsal həlləri təqdim edib.
Yeni veb-sayt yalnız məlumat təmin etmək deyil, eyni zamanda müştərilərin xidmətlərdən daha rahat və sürətli istifadə etməsi üçün hazırlanıb. Bu, “Azərpoçt” MMC-nin müasir texnologiyalara inteqrasiya prosesində növbəti mühüm addımıdır.
