MİLLƏT VƏKİLİ VÜQAR İSKƏNDƏROVDAN MÜHÜM AÇIQLAMA
“DÖVLƏT HƏR KƏSİN QAPISINI DÖYÜB “BALIQ VERMƏK” NİYYƏTİNDƏ DEYİL”
MİLLƏT VƏKİLİ VÜQAR İSKƏNDƏROVDAN MÜHÜM AÇIQLAMA
Ölkə yeni iqtisadi mərhələyə qədəm qoyur. Məqsəd odur ki, dövlətin gəlirləri təkcə bir neçə sahədən asılı olmasın. Necə ki, rayonlara verilən dotasiyalar dayandırıldı, özlərini maliyyələşdirmə sisteminə keçildi, ölkənin də dayanıqlı maliyyə resurslarının təmin olunması əsas vəzifədir. Bu mənada ən vacib istiqamətlərdən biri kiçik və orta biznesin inkişafına daha çox diqqət ayrılmasıdır. Bunu Millət vəkili Vüqar İskəndərov “Azpolitika“ saytına müsahibəsində deyib. O bildirib ki, dünyanın bütün ölkələrində iqtisadiyyatın təməli məhz kiçik və orta sahibkarlıqdır. Vergi siyasətində də insanların vergi ödəmə anlayışı — vergi mədəniyyəti — formalaşmalıdır. İnsan bilməlidir ki, bu gün ödədiyi vergi gələcəkdə ona xidmət, infrastruktur və sosial təminat kimi qayıdır. Bu sahədə əvvəlki illərlə müqayisədə ciddi irəliləyişlər var, amma potensial daha böyükdür. Dövlət üçün vacib məsələ kiçik sahibkarı dəstəkləmək, ona lazımi alətləri təqdim etməkdir. Artıq insanlara mesaj verilməlidir ki, dövlət hər kəsin qapısını döyüb “balıq vermək” niyyətində deyil; məqsəd “balıq tutmağı öyrətməkdir” deyə millət vəkili bildirib. Vüqar İskəndərov onu da vurğulayıb ki, son illərdə qeyri-neft-qaz sektorunun büdcədəki payı əhəmiyyətli dərəcədə artıb. Uzun illər büdcəmiz əsasən enerji sektorundan asılı olub. Lakin hazırda qeyri-neft sektorundan daxilolmalar daha sürətlə artır və bu, büdcə üçün böyük irəliləyişdir.
