ÖLKƏ TARİXİNDƏ ƏN BÖYÜK AMNİSTİYA AKTLARINDAN BİRİ
20 MİNDƏN ÇOX ŞƏXSƏ ŞAMİL EDİLƏCƏK
ÖLKƏ TARİXİNDƏ ƏN BÖYÜK AMNİSTİYA AKTLARINDAN BİRİ
Azərbaycan Prezidenti amnistiya elan olunması təşəbbüsünü irəli sürüb. Sənəd artıq Milli Məclisinə təqdim olunub. Amnistiya aktının ümumilikdə 20 mindən çox şəxsə şamil olunacağı, onlardan 5 mindən çoxunun azadlıqdan məhrumetmə cəzasından azad ediləcəyi, 3 mindən artıq şəxsin cəzasının azaldılacağı, 7 mindən çox məhkumun azadlığın məhdudlaşdırılması cəzasından, 4 minə yaxının isə azadlıqdan məhrumetmə ilə bağlı olmayan digər cəzalardan və ya şərti tətbiq edilən cəzalardan, habelə mindən çox şəxsin cinayət məsuliyyətindən azad ediləcəyi proqnozlaşdırılır. Layihəyə əsasən,Vətən müharibəsi və 2023-cü il antiterror əməliyyatlarında iştirak edən şəxslər, eləcə də bu əməliyyatlarda həlak olan və ya itkin düşən şəxslərin yaxın qohumları, Ermənistanın mülki əhaliyə qarşı hərbi təxribatı nəticəsində əlil olanlar, qadınlar, 60 yaşdan yuxarı şəxslər, cinayət törədərkən yetkinlik yaşına çatmayanlar cəzadan və ya cinayət məsuliyyətindən azad edilmələri nəzərdə tutulur. Bununla yanaşı, böyük ictimai təhlükə törətməyən və ya az ağır cinayət, habelə ehtiyatsızlıqdan cinayət törətdiklərinə görə azadlıqdan məhrumetmə cəzasına məhkum oluan bir sıra şəxslər cəzadan azad ediləcək və ya cəzalarının çəkilməmiş hissəsi azaldılacaqdır. Bu, ölkə tarixində ən böyük amnistiya aktlarından biri hesab olunur.
