Azərbaycan tarixində ilk dəfə quruda 4400 m dərinlikdə üfüqi quyu qazılacaq
GL Group Azərbaycan tarixində ilk dəfə quruda yerləşən dərin neft laylarına çatmaq üçün 4400 metr dərinlikdə və təxminən 400 metr yanal uzunluğa malik üfüqi neft quyusu qazacaq.
Şirkətin yaydığı məlumatda bildirilir ki, qeyd olunan üfüqi quyunun qazılması Salyan rayonundakı “Kürsəngi” və “Qarabağlı” yataqlarında qazma işlərində yaranmış 14 illik fasiləyə son qoyacaq və həmin yataqlarda üç yeni mürəkkəb dərin quyunun qazılmasını nəzərdə tutan daha irimiqyaslı qazma təşəbbüsü çərçivəsində yerinə yetiriləcək.
Şirkət bu həftə qazma xidmətləri üçün həm yerli, həm də beynəlxalq tərəfdaşlar arasında tender elan edib. GL Group innovativ texnologiyalar tətbiq etməklə Azərbaycanın neft-qaz sektorunda əməliyyat səmərəliliyini artırmağı hədəfləyir. Şirkət əvvəlcə Abşerondakı altı quyuda qazma işlərini uğurla tamamlayıb, bu quyuların hasilatı ilkin proqnozları üstələyib.
Bundan əlavə, GL Group “Kürsəngi” və “Qarabağlı” yataqlarında istismar proqramları ilə baza hasilatının azalmasını dayandırıb. Şirkət 2024-cü ildə beynəlxalq miqyasda fəaliyyətini genişləndirərək Türkiyənin Trakya hövzəsində Kanada şirkəti “Gazelle Energy Limited”in 25% payını satın alıb.
