40 GÜNLÜK ABŞ-İRAN MÜHARİBƏSİ NEÇƏYƏ BAŞA GƏLDİ?
40 GÜNLÜK ABŞ-İRAN MÜHARİBƏSİ NEÇƏYƏ BAŞA GƏLDİ? XƏRCLƏR VƏ İTKİLƏR AÇIQLANDI
Ekspertlərin hesablamalarına görə, ABŞ-nin İrana qarşı hərbi əməliyyatlarının xərcləri təxminən 30 milyard dollar təşkil edib.Oxu.Az bu barədə “Financial Times” nəşrinə istinadən xəbər verir. Bildirib ki, fevralın 28-dən etibarən İrana qarşı aparılan hərbi kampaniyanın dəyəri 22,3 milyard dollardan 31 milyard dollara qədər dəyişib.Rəsmi məlumatlara əsasən, əməliyyatlar zamanı 13 ABŞ hərbçisi həlak olub, 300-dən çox hərbçi isə yaralanıb. Maddi xərclərlə bağlı ekspertlər qeyd edirlər ki, ümumi məbləğə avadanlıq və hərbi texnikanın dəyişdirilməsi və təmiri üçün ayrılan 2-3,6 milyard dollar da daxildir.Ən böyük xərclərdən biri yanğından sonra “Gerald Ford” aviadaşıyıcısının təmiri və Qətərdə İran PUA-ları tərəfindən zədələnən erkən raket xəbərdarlıq sisteminin bərpası olub. Bundan əlavə, Səudiyyə Ərəbistanındakı ABŞ Hərbi Hava Qüvvələrinin aviabazasına endirilən zərbə nəticəsində ciddi zədələnmiş uzaqmənzilli radiolokasiya aşkarlama təyyarəsinin dəyişdirilməsi üçün təxminən 700 milyon dollar tələb olunub. Həmçinin İordaniya və Qətərdə yerləşən iki yerüstü radiolokasiya stansiyasının təmiri üçün 485 milyon dollar xərclənib.
