Bakıda COP29-la bağlı təqdimat keçirilib

Kiçik və Orta Biznes Subyektləri və Klublarının Assosiasiyası (KOBSKA) və “Davamlı Gələcək Platforması”nın COP29 çərçivəsində birgə təşkil olunacaq pavilyonunun təqdimat mərasimi keçirilib.

Tədbirin açılışında KOBSKA-nın İdarə Heyətinin sədri Nigar Ələsgərova nitq söyləyib. Ardınca Kiçik və Orta Biznesin İnkişafı Agentliyinin sədr müavini Hikmət Məmmədov, “Davamlı Gələcək Platforması”nın təsisçisi və “Türk Dünyası Kənd Təsərrüfatı Birliyi”nin sədri Doğan Başaran, eləcə də “Agriconnect Türkiye” rəhbəri Havva Olçum çıxış ediblər.

Rəsmi açılış mərasimindən sonra Havva Olçum COP29-da qurulacaq stendin detalları barədə məlumat verərək, sahibkarların KOBSKA və “Davamlı Gələcək Platforması” stendində təmsil olunmaq imkanlarını izah edib.

Daha sonra sahibkarların, media nümayəndələrinin və tədbir iştirakçılarının sualları cavablandırılıb.

Çıxışlar “Trendyol” şirkətinin Korporativ Kommunikasiyalar rəhbəri Süheyla Cəfərova, “İyi Gelecek Sürdürülebilirlik” Konsaltinq şirkətinin təsisçisi Aslı Pasinli, və Prof. Dr. Levent Kurnaz tərəfindən davam etdirilib. Tədbirdə 100-ə yaxın iştirakçı olub. Təqdimatın sonunda çıxışçılar, sahibkarları və media nümayəndələrini gələcəyin formalaşdırılmasında aktiv iştirak etməyə çağırıblar.

Qeyd edək ki, “Trendyol” şirkəti COP29-da qurulacaq stendin baş sponsorudur. Xatırladaq ki, dünyanın ən böyük iqlim sammitlərindən biri olan COP29, 11-22 noyabr tarixlərində ölkəmizdə baş tutacaq.