“Made in Azerbaijan” Brendinin Beynəlxalq Səviyyədə Tanıdılması Müzakirə Edilib
İxracın və İnvestisiyaların Təşviqi Agentliyi – AZPROMO, ADA Universitetinin Biznes Məktəbi və İtaliyanın Luiss Universiteti arasında “Qlobal İdarəetmə və Siyasət” (GMAP) ixtisası üzrə ikili diplom magistr proqramının “Made in Azerbaijan” tədris planının təqdimatına həsr olunmuş müzakirə sessiyasında iştirak edib.
Biznes TV AZPROMO-ya istinadən xəbər verir ki, sessiyada bir sıra dövlət qurumlarının nümayəndələri iştirak edib və “Made in Azerbaijan” brendinin beynəlxalq səviyyədə tanıdılması imkanları müzakirə olunub.
AZPROMO-nun icraçı direktoru Yusif Abdullayev brendin beynəlxalq arenada tanıdılması istiqamətində görülən işlərdən bəhs edib. O vurğulayıb ki, “Made in Italy” təcrübəsi Azərbaycanın ixrac potensialını artırmaqda mühüm rol oynayacaq və ADA Universiteti ilə birgə həyata keçirilən tədris proqramı bu prosesə əhəmiyyətli töhfə verəcək.
ADA Universitetinin akademik işlər üzrə prorektoru Elkin Nurməmmədov bu təşəbbüsün Azərbaycan məhsullarının qlobal rəqabət qabiliyyətini artırmaq baxımından əhəmiyyətini qeyd edib. “Luiss Universiteti”nin professorları Marko Mazzu və Karlo Fei isə “Made in Italy” təcrübəsi barədə məlumat veriblər.
Tədris proqramından əldə ediləcək biliklərin “Made in Azerbaijan” brendinin beynəlxalq bazarda möhkəmlənməsinə ciddi töhfə verəcəyi vurğulanıb.
Sessiya, “Made in Italy” təcrübəsi ilə “Made in Azerbaijan” brendinin inkişaf perspektivlərinin strateji yanaşmalar əsasında müzakirəsi ilə yekunlaşıb.
