AZAL TƏYYARƏSİNİN QƏZAYA UĞRAMASI TƏSADÜF DEYİLMİŞ
ARAŞDIRMA ‘VURULDU’ VERSİYASINI TƏSDİQLƏDİ AZAL TƏYYARƏSİNİN QƏZAYA UĞRAMASI TƏSADÜF DEYİLMİŞ
2024-cü il dekabrın 25-də Qazaxıstan ərazisində qəzaya uğrayan AZAL-a məxsus “Embraer 190” təyyarəsi vurulub. Qazaxıstan Nəqliyyat Nazirliyi hadisə ilə bağlı aparılan araşdırma ilə bağlı aralıq məlumatını açıqlayıb. Aralıq məlumata, eləcə də Azərbaycan, Rusiya, Qazaxıstan, Braziliya və ICAO ekspertlərinin ümumi rəyinə əsasən, təyyarə idarəetməni hər hansı texniki nasazlıq səbəbindən deyil, xarici müdaxilə nəticəsində itirərək qəzaya uğrayıb. Bu da təyyarənin vurulduğunu bir daha təsdiq edib. Sənəddə oksigen balonlarının zədələnmədiyi vurğulanaraq daxili partlayış ehtimalı istisna edilib. Eyni zamanda, təyyarəyə zərər vuran kənar metal hissəciklərin silah sisteminə aid olduğu qeyd olunub, lakin həmin sistemin modeli açıqlanmayıb. Silah sisteminin Rusiya Müdafiə Nazirliyinin hava hücumundan müdafiə qüvvələrinə aid olması həmin ölkənin Prezidentinin siyasi bəyanatında artıq qeyd olunub. Qeyd edək ki, Qazaxıstanın Nəqliyyat Nazirliyinin məlumatına görə, təyyarə qəzası ilə bağlı araşdırma Beynəlxalq Mülki Aviasiya haqqında Çikaqo Konvensiyasının 13 saylı Əlavəsi əsasında, Beynəlxalq Mülki Aviasiya Təşkilatı, Azərbaycan, Braziliya və Rusiya nümayəndələrinin iştirakı ilə aparılır. Yekun hesabatın qəzanın ildönümünə qədər hazırlanması mümkün olmadığından ictimaiyyətə aralıq bəyanat təqdim olunub. Qazaxıstan tərəfi yekun hesabatı növbəti mərhələdə açıqlayacaq.
