HANSI BİZNESLƏR GƏLİR VƏD EDİR?

HANSI BİZNESLƏR GƏLİR VƏD EDİR? KOBİA SAHİBKARLAR ÜÇÜN 9 PERSPEKTİVLİ SAHƏNİ AÇIQLADI

Kiçik və Orta Biznesin İnkişafı Agentliyinin təşəbbüsü ilə sahibkarlar üçün doqquz istiqamət üzrə daxili bazar araşdırmaları aparılıb.Bu barədə KOBİA məlumat yayıb. Araşdırmalar bu sahələri əhatə edir:

• bulqur və mərci istehsalı;
• mebel üçün metal və plastik aksesuarlar və mexanizmlər istehsalı;
• tikinti və qida məhsullarının qablaşdırılmasında istifadə olunan dəmir qutuların istehsalı;
• süd və şirə məhsullarının qablaşdırılması üçün karton qutuların istehsalı;
• velosiped hissələrinin istehsalı;
• tikinti üçün izolyasiya məhsullarının istehsalı;
• strafor – genişlənmiş polistirol istehsalı;
• kalsium-karbonat emalı;
• yerfındığı məhsullarının istehsalı. Bu sahələrdə məhsul və xidmətlər yaratmaq, eləcə də fəaliyyətini genişləndirmək istəyən sahibkarlar KOBİA-nın www.smb.gov.az internet saytına daxil olaraq müvafiq bazar araşdırmaları ilə tanış ola bilərlər.Qeyd edək ki, daxili bazar araşdırması mexanizmi üzrə dövlət dəstəyi KOBİA tərəfindən təmin edilir. Daxili bazar araşdırması sahibkarların müraciəti və KOBİA-nın təşəbbüsü əsasında aparılır. Belə ki, mikrosahibkarlıq subyektləri üçün araşdırma xərclərinin 80 faizi, kiçik sahibkarlıq subyektləri üçün isə 50 faizi dövlət tərəfindən qarşılanır. Hər bir daxili bazar araşdırmasının aparılmasına görə ödənilən dəstək məbləği maksimum 20 min manatdır.Sahibkarların müraciəti əsasında aparılan bazar araşdırmaları KOBİA-nın sifarişi ilə və “Dövlət satınalmaları haqqında” qanuna uyğun olaraq tender yolu ilə həyata keçirilir. Müraciət etmək istəyən sahibkarlar Agentliyin saytında yerləşdirilən ərizə formasını dolduraraq birbaşa və ya elektron qaydada müraciət edə bilərlər.