Torpaq sahələri üzrə icarə ƏDV-yə cəlb edilməyəcək – BU TARİXDƏN
“Vergi Məcəlləsinə” ediləcək dəyişikliklərə əsasən, hüquqi şəxslər tərəfindən torpaq icarəsinə görə əldə edilən icarə haqqı ƏDV-dən azad ediləcək. Bu dəyişiklik gələn aydan qüvvəyə minir və torpaq sahələri üzrə icarə ƏDV-yə cəlb edilməyəcək.
Maraqlıdır, bu dəyişikliyin iqtisadi təsirləri necə olacaq?
Mövzu ilə bağlı Sfera.az-a açıqlama verən iqtisadçı deputat Vüqar Bayramov, bu addımın sahibkarları dəstəkləmək məqsədi daşıdığını vurğulayıb. O bildirib ki, dəyişiklik sahibkarların xərclərinin azalmasına və gəlirlərinin artmasına şərait yaradacaq:
“Torpaq sahələrinin icarəsini təklif edən sahibkarlar ƏDV ödəməkdən azad ediləcəklər. Bu, sahibkarların xərclərini azaltmaqla yanaşı, torpaqların icarə qiymətinə də müsbət təsir göstərə bilər. Hazırda torpaqların icarə qiymətləri müəyyən edilərkən 18%-lik ƏDV nəzərə alınır və bu xərc çox vaxt icarə haqqına əlavə olunur. Yeni ildən etibarən tətbiq ediləcək ƏDV güzəşti torpaqların icarə haqqının azalmasına səbəb ola bilər”.
Deputat əlavə edib ki, bu dəyişiklik yalnız sahibkarların dəstəklənməsi ilə məhdudlaşmır, həm də uçotun güclənməsinə xidmət edir. Beləliklə, dəyişiklik həm sahibkarların fəaliyyətinə müsbət təsir göstərəcək, həm də iqtisadi şəffaflığı artıracaq.
