Azərbaycan Sahibkarlar Konfederasiyasına yeni Baş katib təyin olunub
Azərbaycan Respublikası Sahibkarlar (İşəgötürənlər) Təşkilatları Milli Konfederasiyasının prezidenti Məmməd Musayevin əmri ilə Ziya Cahangir oğlu Hacılı təşkilatın Baş katibi vəzifəsinə təyin edilib.
BiznesTV “APA-Economics”-ə istinadən xəbər verir ki, Konfederasiya prezidenti Məmməd Musayev bununla bağlı əməkdaşlarla keçirdiyi görüşdə Z.Hacılını təyinatı münasibətilə təbrik edib. M.Musayev təşkilatın ölkəmizdə biznes mühitinin əlverişliliyinin artırılması, dövlət-özəl dialoqunun inkişafı istiqamətində gördüyü işlərə toxunaraq icra aparatının gələcək fəaliyyəti ilə bağlı prioritetləri açıqlayıb. Z.Hacılı bu yüksək etimada görə təşəkkürünü bildirib.
Ziya Hacılı Bakı Dövlət Universitetini fərqlənmə diplomu ilə bitirib, 2012-ci ildə fəlsəfə doktoru alimlik dərəcəsi alıb. O, kommunikasiya, böhran idarəetməsi, beynəlxalq protokol və idarəetmə mövzularında beynəlxalq təlimlərdə iştirak edərək 40-dan çox sertifikat əldə edib. Əmək fəaliyyətinə AMEA-da başlayan Z.Hacılı Fövqəladə Hallar Nazirliyi və Azərbaycan Mərkəzi Bankında rəhbər vəzifələrdə çalışıb.
2024-cü ilin aprelindən Azərbaycan Sahibkarlar Konfederasiyası prezidentinin müşaviri olan Z.Hacılı, yeni təyinatı ilə bağlı göstərilən etimada görə təşəkkür edib.
