AZƏRBAYCANDAN GETDİLƏR, 45 MİLYONLUQ İNVESTİSİYA ALDILAR SÜRƏTLƏ BÖYÜYƏN STARTAP NİYƏ ÖLKƏMİZDƏ İŞİNİ DAYANDIRDI?
Azərbaycanda fəaliyyətini dayandıran Türkiyənin “EasyCep” startapı 45 milyon dollar investisiya alıb. Yenilənmiş elektronika sahəsində sürətlə böyüyən startap
ikinci əl cihazları yalnız alıb-satmır. Onları tam texniki yeniləmədən keçirib 12 aylıq zəmanətlə müştərilərə təqdim edir. Şirkət həmçinin hissəli ödəniş imkanları da yaradır. Hazırda Türkiyədə 300-dən çox fiziki satış nöqtəsi var.Yeni investisiya sayəsində startap təkcə telefonlara yox, planşetlər, noutbuklar, oyun konsolları və ağıllı ev cihazları kimi daha geniş məhsul kateqoriyalarına fokuslanacaq.
Son üç ildə gəlirlərini 15 dəfə artıran “EasyCep” Qətər, Birləşmiş Ərəb Əmirlikləri və Səudiyyə Ərəbistanı bazarlarında da aktivdir və bu yaxınlarda “Xiaomi” ilə strateji əməkdaşlığa başlayıb. Startapın baş direktoru Mehmet Akif Özdemir bildirir ki, yeni mərhələdə əsas məqsəd “EasyCep Express” şəbəkəsini böyütmək, müştəri məmnuniyyətini artırmaq və bazardakı qeyri-rəsmi satışların qarşısını alaraq rəsmi və ekoloji təmiz bir ekosistem qurmaqdır. Bu yanaşma həm texnologiyanı əlçatan edir, həm də elektron tullantıların azalmasına kömək edir.
Maraqlı məqam odur ki,startap bir müddət Azərbaycan bazarında da fəaliyyət göstərib. Lakin logistika xərcləri, sertifikatlaşdırma prosesləri və tələbin stabil olmaması səbəbindən şirkət ölkədə əməliyyatlarını dayandırmağı seçib. “Easycep Azərbaycan” MMC-nin nizamnamə kapitalı 703 min manatdan çox idi və fəaliyyətin dayandırılması 2026-ci ilin noyabrında rəsmiləşdirilib.
