LƏĞV OLUNAN BANKLAR PULLARINI NİYƏ GERİ ALA BİLMİR?ƏSAS SƏBƏBLƏR AÇIQLANDI
Problemli aktivlərin geri qaytarılmasında ən böyük maneələrin nə olduğu açıqlanıb.
Oxu.Az-ın məlumatına görə Əmanətlərin Sığortalanması Fondundan bildirilib ki,buna ən böyük maneə məhkəmə və icra prosesidir. Belə ki, ləğv prosesində olan banklarda problemlər əsasən irihəcmli biznes kreditlərində müşahidə olunur. İstehlak kreditlərində isə vəziyyət nisbətən yaxşıdır. Məsələn,”DəmirBank” ləğv prosesinə başladıqdan sonra onun müştəri bazasının böyük hissəsini mikrokreditlər təşkil etdiyindən, həmin bank üzrə vəsaitlərin yığımı digər ləğv olunan banklarla müqayisədə daha yüksək olub. Biznes kreditlərinin geri qaytarılması isə daha mürəkkəb prosesdir. Çünki biznes müştəriləri banklardan yalnız kredit deyil, zəmanət məktubları, akkreditivlər, hesablaşma xidmətləri və digər bank məhsullarından da istifadə edirlər. Nəticədə ləğv prosesində olan bank qarşısındakı öhdəliklər ikinci plana keçir və gecikmələr yaranır. Bu isə məhkəmə çəkişmələrinə səbəb olur. Bir çox hallarda kreditlərin rəsmiləşdirilməsi zamanı yol verilən nöqsanlar məhkəmə proseslərini uzadır.Məhkəmənin qərarından sonra icraat başlayır.Borcalanlar icra məmurlarının hərəkətlərindən şikayət verdikdə icra prosedurları ləngiyir və vəsaitlərin geri qaytarılması daha da gecikir.
