MİRZOYAN CEYHUN BAYRAMOVA ZƏNG EDİB
MİRZOYAN CEYHUN BAYRAMOVA ZƏNG EDİB
NAZİRLƏR İRANIN NAXÇIVANA HÜCUMUNU MÜZAKİRƏ ETDİ
Azərbaycan və Ermənistanın Xarici İşlər nazirləri İranın Naxçıvana dron hücumunu müzakirə ediblər. Bu barədə Xarici İşlər Nazirliyindən məlumat verilib. Qeyd edilib ki, martın 5-də Azərbaycanın xarici işlər naziri Ceyhun Bayramov ilə Ermənistanın xarici işlər naziri Ararat Mirzoyan arasında telefon danışığı baş tutub.
Telefon danışığı zamanı nazirlər regionda baş verən son hadisələr ətrafında fikir mübadiləsi aparıblar. Tərəflər narahatlıqlarını ifadə edərək gərginliyin daha da artmasına səbəb ola biləcək addımlardan çəkinməyin vacibliyini qeyd edib, sabitlik və təhlükəsizliyin təmin edilməsinin əhəmiyyətini vurğulayıblar.
Nazir Ceyhun Bayramov erməni həmkarını martın 5-də Azərbaycanın Naxçıvan Muxtar Respublikasına qarşı həyata keçirilən, mülki infrastruktura ziyan vurulması və mülki şəxslərin xəsarət alması ilə nəticələnən dron hücumları barədə məlumatlandırıb.
Nazirlər Ermənistan və Azərbaycan arasında dayanıqlı sülhün təmin edilməsinin vacibliyini qeyd edib, qarşılıqlı maraq doğuran məsələlər ətrafında fikir mübadiləsi aparıblar.
