ABŞ-DƏN 20 MİLYARD DOLLARLIQ SAZİŞ TƏKLİFİ
İRAN ZƏNGİNLƏŞDİRİLMİŞ URAN EHTİYATLARINDAN İMTİNA EDƏCƏKMİ?
ABŞ zənginləşdirilmiş uran ehtiyatlarından imtina etməsi müqabilində İranla 20 milyard dollarlıq saziş bağlamaq imkanını nəzərdən keçirir. Məlumata görə, Vaşinqton və Tehran gərginliyin azaldılmasına dair üç səhifəlik planı müzakirə edirlər. Planın əsas bəndi İranın dondurulmuş 20 milyard dollar vəsaitinin blokdan çıxarılmasıdır. Bunun müqabilində Tehran zənginləşdirilmiş uran ehtiyatlarından imtina etməlidir.
Prezident Donald Tramp ABŞ və İran nümayəndə heyətlərinin qarşıdakı həftəsonu saziş bağlamaq üçün danışıqlar aparacağını açıqlayıb. Görüşün Pakistanın İslamabad şəhərində, aprelin 19-da keçiriləcəyi gözlənilir. Danışıqlarda Türkiyə və Misirin dəstəyi ilə Pakistan vasitəçi rolunu oynayır.Danışıqların əvvəlində Vaşinqton Tehrana ərzaq, dərman və digər humanitar malların alınması üçün altı milyard dollar ayırmağa hazır idi. İran tərəfi 27 milyard dollar tələb edirdi. Hazırda 20 milyard dollarlıq məbləğ müzakirə olunur.
Kompromis variantına əsasən, zənginləşdirilmiş uranın bir hissəsi üçüncü ölkəyə göndəriləcək, qalan hissəsində isə İran tərəfi zənginləşdirmə səviyyəsini aşağı salacaq.
Son danışıqlar zamanı amerikalılar iranlılardan 20 illik qadağaya razı olmağı tələb edib. Onlar isə beş illik müddət təklif edib. Tehrana tibbi izotopların istehsalı üçün nüvə tədqiqat reaktorlarına sahib olmağa icazə veriləcək, lakin bütün nüvə obyektləri yerüstü olmalıdır. Mövcud yeraltı obyektlər isə konservasiya ediləcək.
