ABŞ RUSİYA NEFTİNİN SATIŞ ƏMƏLİYYATLARINA İCAZƏ VERDİ

ABŞ RUSİYA NEFTİNİN SATIŞ ƏMƏLİYYATLARINA İCAZƏ VERDİ
MÜHARİBƏNİN İLK İKİ HƏFTƏSİNDƏ MOSKVA 1,9 MİLYARD GƏLİR ƏLDƏ EDİB

ABŞ aprelin 17-dək tankerlərə yüklənən Rusiya mənşəli xam neft və neft məhsullarının satışı, daşınması və boşaldılması ilə bağlı əməliyyatlar üçün icazə müddətini 16 maya qədər uzadıb.Müvafiq müddəa ABŞ Maliyyə Nazirliyinin Xarici Aktivlərə Nəzarət İdarəsinin rəsmi saytında yerləşdirilən ümumi lisenziyada yer alıb.
Lisenziyada xüsusilə qeyd olunur ki, bu, Rusiya Federasiyası tərəfindən ilhaq edilmiş Krım, qondarma “Donetsk Xalq Respublikası” və “Luqansk Xalq Respublikası” , eləcə də İran, Kuba və Şimali Koreya ilə bağlı əməliyyatlara şamil edilmir. Qeyd edək ki,bu addım əvvəlki rəsmi açıqlamalara zidd olaraq, ABŞ rəsmilərinin belə bir lisenziyanı uzatmayacağı vədindən sonra atılıb.Xatırladaq ki,13 martda ABŞ rus nefinə qarşı sanksiyaları ləğv edib. 22 martda isə ABŞ Maliyyə naziri Skott Bessent bildirib ki, rus nefinə qarşı müvəqqəti sanksiyaların yumşaldılması Rusiyaya əlavə 2 milyard dollar gəlir gətirəcək.
Yaxın Şərqdəki münaqişə fonunda dünya bazarında neft qiymətlərinin kəskin yüksəlməsi səbəbindən Rusiya neftdən gözlənilməz əlavə gəlir əldə edir. “Financial Times”ın hesablamalarına görə, qiymətlərin yüksək olduğu hər gün rus büdcəsinə təxminən 150 milyon dollar əlavə vəsait gətirir və yalnız Fars Körfəzindəki müharibənin ilk iki həftəsində Moskva 1,9 milyard dollara qədər gəlir əldə edib.