Quba və Xaçmazda təhlükəli zərərvericiyə qarşı monitorinq və dərmanlama işləri həyata keçirilib
Qəhvəyi mərmər bağacığının aktiv inkişaf mərhələsinə keçməsi ilə əlaqədar olaraq, zərərvericiyə qarşı aparılan mübarizə tədbirlərinin əhəmiyyətini ictimaiyyətə çatdırmaq məqsədilə Quba və Xaçmaz rayonlarında media nümayəndələrinin iştirakı ilə monitorinq və kimyəvi mübarizə tədbirləri təşkil olunub.
Tədbir çərçivəsində əvvəlcə Quba Regional Təlim Mərkəzində qəhvəyi mərmər bağacığının biologiyası, yayılma xüsusiyyətləri, kənd təsərrüfatı bitkilərinə vurduğu ziyan və ona qarşı həyata keçirilən mübarizə üsulları barədə təqdimat keçirilib.
Mütəxəssislərin sözlərinə görə, invaziv zərərverici 300-dən çox bitki növü ilə qidalanaraq məhsuldarlığa ciddi ziyan vurur. Bununla yanaşı, onun insan sağlamlığı üçün hər hansı təhlükə yaratmadığı bildirilib.
Daha sonra Xaçmaz rayonunda zərərvericinin yayıldığı ərazilərdə aparılan monitorinq və kimyəvi mübarizə tədbirləri nümayiş etdirilib. Tədbir iştirakçılarına qəhvəyi mərmər bağacığının erkən aşkarlanması, yayılmasının qarşısının alınması və müasir mübarizə üsulları barədə ətraflı məlumat verilib.
Qeyd olunub ki, zərərvericinin təbii düşməni hesab edilən samuray arısının laboratoriya şəraitində çoxaldılması və bioloji mübarizə tədbirlərində tətbiqi nəzərdə tutulur.
Bildirilib ki, Aqrar Xidmətlər Agentliyi tərəfindən 2026-cı ilin qışlama dövründə ölkənin 34 rayonunda 20 mindən çox nöqtədə monitorinq aparılıb. Zərərvericinin aşkarlandığı 12 rayonda mexaniki və kimyəvi mübarizə tədbirləri həyata keçirilib.
Hazırda qəhvəyi mərmər bağacığı Şabran, Göygöl, Şəki, Balakən, Zaqatala, Qax, Qazax, Ağstafa, Quba, Qusar, Xaçmaz və Yardımlı rayonlarında müşahidə olunur. Onun populyasiyasına nəzarət məqsədilə ötən il 13 mindən çox feromon tələsi quraşdırılıb, cari ildə isə bu rəqəmin 20 mini ötməsi planlaşdırılır.
Aqrar Xidmətlər Agentliyi tərəfindən zərərvericiyə qarşı monitorinq, maarifləndirmə və mübarizə tədbirləri ölkənin müxtəlif bölgələrində davam etdirilir.
