İndoneziyanın Azərbaycandakı səfiri “Biznes TV”nin qonağı olub

Görüşdə iki ölkənin sahibkarları arasında biznes əlaqələrinin inkişafı və birgə media layihələri müzakirə edilib.

11 iyun tarixində İndoneziya Respublikasının Azərbaycandakı fövqəladə və səlahiyyətli səfiri cənab Berlian Helmi “Biznes TV”nin qonağı olub.
Səmimi mühitdə keçən görüşdə cənab səfirə “Biznes TV”nin fəaliyyət istiqamətləri, yerli və qlobal biznes mühitinin işıqlandırılmasında oynadığı rol, eləcə də hazırlanan müasir media layihələri barədə ətraflı məlumat verilib.
Kanalın yaradıcı heyəti ilə görüşən səfir redaksiyanın dinamik iş ahəngini və müasir yayım standartlarını yüksək qiymətləndirib.
Görüş çərçivəsində Azərbaycanın yeganə ixtisaslaşmış biznes kanalı olan “Biznes TV” vasitəsilə iki ölkə arasında iqtisadi əlaqələrin inkişafına dəstək məqsədilə mümkün əməkdaşlıq imkanları və birgə həyata keçiriləcək media layihələri müzakirə olunub.
Səfər çərçivəsində cənab Berlian Helmi “Biznes TV”nin efirində, İdarə Heyəti sədrinin təqdim etdiyi “Perspektiv” verilişinin də qonağı olub. Verilişdə iki ölkə arasında mövcud və potensial iqtisadi münasibətlər, həmçinin gələcək birgə əməkdaşlıq perspektivləri müzakirə edilib.

Görüşün sonunda cənab səfirə “Biznes TV”nin simvolik hədiyyəsi təqdim olunub.