ABŞ-DƏ İLK DƏFƏ SÜNİ YUMURTA YARATDILAR
İNKUBATORDA 30-DAN ÇOX QUŞ BÖYÜDÜLDÜ
ABŞ-nin Colossal Biosciences şirkəti süni yumurtalar vasitəsilə sağlam quş balalarının dünyaya gətirildiyini açıqlayıb.Şirkətin məlumatına görə, bu texnologiya ilə Texasdakı təsərrüfatlardan birində artıq 30-dan çox quş böyüdülüb. Yeni sistem embrionun ana orqanizmindən kənarda inkişaf etməsinə imkan yaradır.Şirkətin rəhbəri Ben Lamm bildirib ki, bu layihə gələcəkdə nəsli kəsilmiş heyvanların yenidən bərpasına kömək edə bilər. Hazırda şirkət Yeni Zelandiyada yüz illər əvvəl nəsli kəsilən nəhəng moa quşlarının geri qaytarılması üzərində işləyir.Məlumata görə, moa quşunun yumurtası adi toyuq yumurtasından təxminən 80 dəfə böyükdür. Buna görə də alimlər xüsusi süni inkubator sistemi hazırlayıblar.Şirkət həmçinin yunlu mamontun xüsusiyyətlərini daşıyan genetik layihələr üzərində də araşdırmalar aparır. Ben Lammın sözlərinə görə, bu texnologiya gələcəkdə həm nəsli kəsilmiş, həm də yox olmaq təhlükəsində olan heyvan növlərinin qorunmasına kömək edə bilər.
