ABŞ-DƏN KOSMOSDA NƏHƏNG MÜDAFİƏ QALXANI
“QIZIL GÜNBƏZ”İN DƏYƏRİ 1,2 TRİLYON DOLLARA ÇATA BİLƏR
ABŞ raket hücumlarına qarşı tarixinin ən iddialı müdafiə layihələrindən birini hazırlayır. Söhbət kosmosa yerləşdirilməsi planlaşdırılan 7800 peykdən ibarət “Qızıl Günbəz” sistemindən gedir.ABŞ Konqresinin yaydığı sənədlərə əsasən, sistem kosmosdan mümkün raket buraxılışlarını saniyələr içində aşkar edərək müdafiə mexanizmlərini işə salacaq.Konqresin Büdcə İdarəsi bildirib ki, “Qızıl Günbəz”in ümumi dəyəri 1,2 trilyon dollara çata bilər. Bu rəqəm Pentaqonun ilkin hesablamalarından təxminən altı dəfə çoxdur.
Sənədlərə görə, təkcə peyklərin hazırlanması, orbitə çıxarılması və istismarı üçün 743 milyard dollar tələb olunur. Bu isə layihənin ümumi dəyərinin təxminən 60 faizini təşkil edir.
