Aİ RUSİYAYA QARŞI 21-Cİ SANKSİYALAR PAKETİNİ TƏSDİQLƏDİBANKLAR, TANKERLƏR VƏ KRİPTOPLATFORMALAR HƏDƏFDƏ
Avropa İttifaqı Şurası Rusiyaya qarşı 21-ci sanksiyalar paketini yekun olaraq təsdiqləyib. Yeni paket Rusiyanın maliyyə sektoru, hərbi-sənaye kompleksi, neft ixracı və sanksiyalardan yayınmağa kömək edən şirkətlərə qarşı əlavə məhdudiyyətləri nəzərdə tutur.
Yeni sanksiyalar çərçivəsində 218 fiziki və hüquqi şəxsə, o cümlədən 48 nəfər və 170 təşkilata qarşı məhdudiyyətlər tətbiq edilib. Həmçinin 94 bank və iri maliyyə institutunun aktivləri dondurulacaq və onlara vəsait ayrılması qadağan olunacaq.Bundan başqa, Rusiyanın 33 kredit təşkilatına, eləcə də sanksiyalardan yayınmağa kömək etdiyi bildirilən bəzi xarici banklara qarşı əməliyyat məhdudiyyətləri genişləndirilib. Sanksiya siyahısına Rusiyanın hərbi-sənaye kompleksinə aid 50-dən çox müəssisə də əlavə olunub.
Paketdə ilk dəfə olaraq üçüncü ölkələrdə fəaliyyət göstərən və Rusiyaya sanksiyalardan yayınmağa kömək etdiyi iddia edilən kriptovalyuta platformalarına qarşı da məhdudiyyətlər nəzərdə tutulub. Bununla yanaşı, Rusiyanın “kölgə donanması”na aid olduğu bildirilən daha 41 tanker sanksiya siyahısına daxil edilib. Bu gəmilərə yanacaq təmin edən və heyət cəlb edən şirkətlərə qarşı da sanksiyalar tətbiq olunacaq.Aİ Şurasının qərarına əsasən, Rusiya nefti üçün qiymət həddi hələlik dəyişdirilməyəcək və bir barel üçün 44 dollar səviyyəsində saxlanılacaq.
