AZAL TƏYYARƏLƏRİNDƏ WI-FI XİDMƏTİ
AZAL TƏYYARƏLƏRİNDƏ WI-FI XİDMƏTİ UÇUŞ ZAMANI İNTERNETDƏN İSTİFADƏ MÜMKÜN OLACAQ
Prezident yanında Antiinhisar və İstehlak Bazarına Nəzarət Dövlət Agentliyi Azərbaycan Hava Yolları yeni nəsil təyyarələrdə sərnişinlər üçün internet xidmətinin təşkili ilə bağlı müraciətinə razılıq verib.
Bu barədə “Report”a Dövlət Agentliyindən məlumat verilib.
Araşdırma zamanı təyyarələrdə internet xidmətinin təşkili ilə bağlı müqavilələr və digər hüquqi sənədlər təhlil olunub. Nəticədə Dövlət Agentliyi internet xidmətinin yalnız sərnişinin öz seçimi əsasında təqdim edilməsi şərti ilə Azərbaycan Hava Yollarının müraciətini müsbət qiymətləndirib.
Yeni xidmət çərçivəsində internet bağlantısı “Viasat” peyk rabitəsi texnologiyası vasitəsilə təmin olunacaq.Sərnişinlər uçuş zamanı sərfəli qiymətlərlə limitsiz, yüksək sürətli internetdən istifadə edə biləcəklər.Biznes sinfi sərnişinləri, eləcə də “AZAL Miles” loyallıq proqramının “Elite” və “Platinum” statuslu üzvləri bortdaxili internet xidmətindən ödənişsiz yararlana biləcəklər. Bunun üçün internetə qoşulma portalında ad, soyad və oturacaq nömrəsini daxil etmək kifayətdir.İnternetə qoşulma portalı vasitəsilə sərnişinlər, həmçinin heç bir əlavə ödəniş etmədən uçuşdaxili əyləncə sisteminə qoşularaq film, musiqi və digər rəqəmsal məzmunlardan istifadə edə bilirlər.Uçuşdaxili internet xidməti hazırda AZAL-ın yeni nəsil “Airbus A320neo” və “Airbus A321neo” tipli təyyarələrində mövcuddur. Gələcəkdə donanmaya qoşulacaq bütün yeni nəsil hava gəmilərində də bu xidmət sərnişinlərin istifadəsinə veriləcək.
